اوراق مبعثره..في العيد

مساء الخير

اليومم 29 رمضان

المفروض يكون باجر اخر يوم بالشهر الفضيل

كل عام وانتوا بخير مقدما

وعساكم من العايدين

ارتبك دايما يوم ابدى بكتابة اي شي

ما اعرف ليش

احس الافكار تتزاحم داخلي

تبي تطلع..بس كلها مع بعض

يبيلي انظمها..واخليها توقف بالطابور:)

قلبي يعورني..مااعرف ليش

واليوم حلمت باحلام غريبه..الغريب فيها انها واقعيه

يعني تمس حياتي الشخصيه بشكل مباشر

يمكن كنت افكر بهالامور بعقلي الباطن..يعني بدون مااحس

الحياه معقده

خيوط متشابكه ما تعرف كل خيط من وين يبدى ووين ينتهي

والمشكله ان احنا عالقين وسط هالخيوط

كل ما نحاول نفك شي نلقى خيط جديد يقيدنا

مثل بيت العنكبوت!

ادري ان هالكلام مش مناسب ابد ينقال بوقت مثل ها

وقرب العيد

المفروض اتكلم اليوم عن شي حلو وسعيد

يتناسب مع المناسبه يعني

تدرون..العيد للصغار بس..مش لنا احنا

يوم كنت صغيره كنت احس فعلا بطعم العيد

كنا ننتظر كل عيد عشان نيمع العيديه

ونخطط شو بنسوي بهالعيديه من قبلها بشهرين

بعد العيد بكم يوم نكون خلاص صرفنا العيديه كلها

وحققنا كل امنيات العيد:)

والله كانت ايام

المهم الحين اتمناالكم اجازه سعيده بالعيد

وعسى الله يعيده عليكم بالخير يا رب

واشوفكم بعد العيد

عيد ميلادي

مساء الخير

باجر عيد ميلادي

بغيت اخبركم بهالمناسبه عشان تشاركوني فيها

سنه جديده انضافت لسنين عمري

وورقه جديده انطوت من صفحات كتابي

بكره..بكون ختمت سنيني الاربع وعشرين

قبل وانا صغيره..كنت اشوف 24 سنه شي كبيييييييييييييييير

وكنت احس اني يوم بوصل لهالعمر بكون عشت واااااااااااااااااايد

بعدين اكتشفت ان الواحد على كثر ما يعيش..يحس نفسه بعده ما شاف من الدنيا شي

ويحس انه محتاج يتعلم المزيد في مدرسة الحياه

ايامنا تجري.والسنين تمر..وسنوات العمر تنقضي..بدون ما نحس

عشان جيه الواحد لازم يلحق يسوي شي مفيد بحياته

قبل ما تفوته الفرصه..ويندم على اللي فات من عمره..ويقول يا ليت

انا عن نفسي مشاريعي هالسنه اني باخذ دوره كمبيوتر..وبقدم على وظيفه

احس اني خلاص تشبعت من الكسل ومن يلسة البيت

ابا ابدى حياتي العمليه..ولحرب شي يديد

واتمنى اكون بهالطريقه فتحت لنفسي باب اتعلم منه اشيا تفيدني

وتطور شخصيتي وتحسنها..وبالنهايه..من هالحياه..نستفيد:)

احساس بـ(الفقد)ـ!! محمد الحضيف

صباح الخير

لاحظت انه احاسيسي الصباحيه..تختلف جدا عن احاسيسي المسائيه

ورجاءا لا تسالوني بشو..لاني ما اعرف!!

اليوم اول ما غفت عيني..حلمت اني امشي وتعثرت

وحسيت بفقدان توازن ..ونطيت نطه محترمه ع السرير..خلتني اقوم من النوم

وطار النوم من عيني..كالعاده!!

كنت اقلب بهالمودنات

هالعالم الغريب اللي مااكتشفت وجوده الا عن ما قريب

وتحديدا بعد وفاة هديل الحضيف

الملفت للنظر اني من مستتعملي النت من سنيــــــــين

تتجاوز العشر بقليل

يعني كل هالمده كيف ماانتبهت ان في شي اسمه تدوين؟

حدود معرفتي كانت تقتصر ع المنتديات

وعالمها..اللي اقدر اقول عنه الحين سخيف..وفاشل حاليا

اكتشفت ان التدوين ها عالم كبيرر

والسالفه مش مثل ما كنت اتصور مجرد شخابيط وتعبير ووجهات النظر

لا..السالفه فيها شطب مدونات وسجن..وتدخل من جهات عليا!!

اكتشفت ان الموضوع كبير

الله يرحمج يا هديل فتحتي عيني ع مواضيع مش ولا بد :)

طبعا اكيد انتبهتوا ان العنوان ما يمت للمضمون بصله

شو دخل الفقد باللي انا اقوله

بس هاي المقدمه لا تستعيلون

من كم يوم زرت الموقع الرسمي لوالد هديل

وقريت اخر مواضيعه بعنوان موت اخضر

http://www.alhodaif.com/main/?p=124

قلبي عورني عليه

احساس الفقد احساس صعب..واليم

واسوا ما فيه ان محد يحس فيك..يعني الحياه تتم مستمره بنفس الروتين

وكل شي يمشي مثل ما كان

وكأن الدنيا ما انتبهت ان هالشخص العزيز عليك..ما عاد موجود!!

او كأن الحياه تتجاهل الفقيد..تتلفت حواليك..تلقى كل شي ماشي

والحياه بعدها ع روتينها المعتاد..تسال نفسك..وين هالانسان؟

وطبعا الاجابه تكون انه خلاص مش موجود..تتلفت..يمين ويسار

تبي تستوعب هالحقيقه..تسأل نفسك مره ثانيه..طيب متى يرجع

والاجابه تكون..ما بيرجع..خلاص راح !!

بسهوله جيه..تكون الاجابه بسيطه وحاسمه

وعلى كثر بساطتها الظاهريه..تلقى فيها الاف العقد من داخل

طيب كيف راح..متى راح..كيف يعني ما بيرجع

يعني ما بشوفه بعد؟

يعني ما انتظره كالمعتاد؟

يعني لو دخلت غرفته بتكون فاضيه

طيب سريره؟ مكتبه؟ كمبيوتره..؟

كل اغراضه اللي تنتظره وين بتروح؟

خلاص..ما عاد لها صاحب الحين!

اليوم كنت اتابع مقال بوحده من المدونات..المقال من السنه اللي فاتت

فجاه..طلعت بويهي هديل..لقيت تعليقها ع الموضوع..قلت سبحان الله..يحي العظام وهي رميم!

بعدين استوعبت ان هالرد قديم..وانه بموت الانسان كلماته ما تموت.

.يبقى شي من اثره ع الاقل!!

احساس قوي وصلني اليوم..الفقد فعلا شي اليم

اقسى شي ممكن تسوي فينا الحياه

انها تاخذ منا انسان عزيز علينا

الله يكون بعونك يا د.محمد الحضيف

وعسى الله يبرد قلبك ويلهمك الصبر والسلوان..مجددا

لاني ادري ان لو الناس نست..فانت اكيد ما نسيت!!

رمضان كريم

كل عام وانتوا بخير بمناسبة دخول الشهر الفضيل

شهر رمضان

وعسى يعيده عليكم وع كل المسلمين بالصحه والسلامه يا رب

حاليا يالسه اتابع مسلسل عائلتي ع قناه فنون

مسلسل حلو انصحكم بمتابعته:)

وامس يوم انتهت الحلقه انتبهت ان كاتب قصة المسلسل هو ولد الفنان الكبير عبد الحسين عبد الرضا

طبعا وها سبب اقوى يخليكم تتابعونه

الحين خلنا من المسلسلات ومن الوصله الترفيهيه هاي

وخلونا نتكلم عن اجواء رمضان الاخرى

طبعا اكتشفت هالسنه ان التلفزيون ها وحش شره يلتهم الوقت بشكل فظيييع

يمكن هالسنه اول سنه ايلس فيها ع التلفزيون واتابع اللي فيه

لاني بالعاده ما احب التلفزيون وايد وما اتابع الا افلام وبين الحين والاخر

يعني مش بشكل مستمر

الحين اليوم ثالث يوم برمضان وانا احس الوقت يمر بين ايديني مثل الرمل

ما احس فيه

بصراحه التلفزيون صدق..مثل البحر يجرفك بتياره القوي بدون ما تحس

طبعا وكالعاده بعيدا عن التلفزيون بديت اقرى قران عشان احاول ان الله قدرتي اختمه بهالشهر الفضيل

وان شالله الله يقدركم انتوا بعد وتختمونه

فنهاية رمضان اللي طاف

وصلني خبر محزن

عن وفاة شخصيه كنت اعزها واحترمها وايد

بس يلا هاي الدنيا

ما نقدر نقول غير الله يرحمنا اجمعين

وهم السابقون ونحن اللاحقون

الله يحسن عاقبتنا بس

طبعا برمضان ما نلقى وقت نسوي شي نحس الساعات تمر بشكل سريع

بالنهار ما لنا نفس نسوي شي او نطلع مكان لان احنا صايمين

والمغرب عقب الفطور كسل وتعب ونحس عمارنا ما نبي نطلع من البيت

يعني باختصار ما نلقى طول اليوم وقت عشان نسوي فيه اي شي

عندي وايد مشاريع مؤجله حتى اشعار اخر

واكيد انتوا بعد اجلتوا وايد اشيا لبعد انقضاء هالشهر الفضيل

الحين اسمحولي ما بطول عليكم

ونلتقي مره ثانيه عن قريب

تلبك..فكري!!

مسا الخير

بداخلي اليوم انفعالات كثيره

ما اعرف بقدر اطلعها بشكل مرتب ومفهوم والا لا

اليوم مريت بمواقف وايد

وكل موقف كان له تاثيره الخاص علي

وللاسف تاثير سلبي بشكل عام

حسيت اليوم بضيقه كبيره

وكنت اسال نفسي وانا حاسه اني بختنق وقلبي منقبض من الضيق

يا ترى ليش الدنيا جيه

مرات اتسائل..الدنيا سيئه..والا احنا بتصرفاتنا اللي نخليها بهالسوء

ظروفنا يا ترى احنا اللي نكونها..والا تنفرض علينا؟

اكيد في جزء منها يكون مما جنت ايدينا

وفي جزء ثاني يكون مفروض..حكم القدر يعني

بس يا ترى لاي مدى ممكن احنا نتحكم بالجزء المفروض؟

ما في حد مثلا يقدر يتحكم بيوم وفاته..او بالمكان اللي بيموت فيه

او بانه يختار اخر تصرف بيسويه قبل ما يموت

اشياا وايد مثل هاي..ما نقدر نتحكم فيها

نقدر نختار مثلا تخصصنا فالجامعه..نوع الاكل اللي بناكله..المكان اللي بنسكن فيه

وطبعا حتى هالخيارات مش متوافره لكل الناس

تعالوا خلنا كل واحد فينا يسال نفسه

هو شو اختار فحياته..وشو الشي اللي انفرض عليه

انا عن نفسي ..اول شي ما اخترته فحياتي..اني انولد بين ام واب منفصلين

كنت دوم اتخيل اني ارجع من المدرسه القى امي وابوي فبيت واحد

واتخيل يا ترى شو ممكن يكون احساسي ساعتها؟

اعرف ان ها شي عادي وايد بالنسبالكم لانكم متعودين عليه

بس بالنسبه لانسانه ما عاشت بجو اسره..بالنسبالي ها شي ما حسيت فيه

واتخيل لو صار شو ممكن يكون شعوري..ولاي مدى اصلا ممكن يصير؟

الحين طبعا كبرت وتجاوزت خيالات الطفوله..

بس رغم هالشي احط موضوع انفصال عائلتي على بداية قائمة الامور اللي ما اخترتها

وهو ابرز الامور اللي اعتبرها فرضت علي!!

يمكن لان هالموضوع ترتبت عليه نتايج ثانيه وايد بحياتي

الحين ارد بذكرياتي لورى..ما كان في شي مهم ما اخترته تقريبا

بيني وبينكم خياراتي ما كانت متعدده..فشيئ طبيعي اني مع ندرة الخيارات وقلتها

اختار افضل الموجود..هذا طبعا ان توافر:)

غالبا كنت اتخيل اني يوم بكمل ال18 سنه بستقل بسكن بروحي

كنت متاثره وايد بموضوع الاستقلال

كنت ابا اعتمد على نفسي بكل شي

يمكن لان جو البيت كان مشحون وايد

عشان جيه كان دوم هدفي الوحده والاستقلال

كنت ابا اشتغل واسكن بشقه بروحي واقطع صلتي بكل افراد عائلتي

طبعا هالكلام لين وصلت ال16 او 17 سنه

كان بالنسبالي هالكلام قرار محسوم ومفروغ منه

بس بعدين كبرت وتغيرت حياتي شوي..وكبر عقلي مثل ما يقولون:)

المهم احس اني اليوم تكلمت وايد واحس اني سويت موضوع تعبير

يكفي اليوم..وبكمل مره ثانيه ان شالله

حياتي الليله

مسا الخير

صباح الخير

الساعه 4 و21 دقيقه فجرا

يلست عالنت بعد محاوله فاشله استغرقت ساعه كامله..

وها كله في سبيل النوم

وطبعا مثل ما انتوا شايفين المحاوله ما نجحت..

وبائت بالفشل الذريع

والدليل اني قاعده اكتبلكم الحين وبهالوقت..!

ما اعرف شو سر ارتباطي بالليل وارتباط الليل فيني

وما اعرف كيف اقطع صلتي مع حياتي الليله

او ع الاقل أحد شوي من هالصله

استانس وايد يوم انام من وقت واقوم الصبح مبجر

مثل البنات الشاطرات

بس للاسف هالشي ما يستوي الا نادرا جدا

انا من النوع اللي ما ينام بسرعه

بصراحه احسد الناس اللي عندها القدره على النوم السريع

يعني اللي يحطون راسهم ع المخده وبعدها بعشر دقايق تسمع

خشششششششششششششششش

صوت شخيرهم

انا لو احط راسي ع المخده بعدها بساعه تلقوني بعدني فاتحه عيوني الاثنين

وعلى اقصى اتساع بعد..مثل السمكه..مبققه عيني بالظلام

المهم الحين اترككم عشان ارد احاول مره ثانيه ارقد

عل وعسى انجح باللي فشلت فيه من شوي

ويلبي سلطان النوم المعظم..ندائي الملح له:)

كتابان

طبعا تذكرون اني اخر كتاب كنت اقراه هو كتاب ابنة الليل

ويوم قريته تفاجأت انه هالكتاب هو جزء ثاني لكتاب قريته سابقا بعنوان المصريه

لنفس الكاتب طبعا ولنفس دار النشر

بس الحلو بالموضوع اني شريت الروايه عن طريق الصدفه ولانها لنفس الكاتب

وما دريت انها الجزء الثاني للكتاب اللي سبق لي قرائته

ولما اكتشفت هالشي اثناء قرائتي للجزء الثاني من الروايه اللي اسمها ابنة النيل

وايد استانست لاني تابعت تطورات الاحداث اللي استوت فالجزء الاول

طبعا اللي لفت نظري بالموضوع انه القصه ما فيها اي شي يدل على انها جزء ثاني

ولا في حتى ملخص للجزء الاول فالكتاب اليديد

يعني اللي ما قرى المصريه ما بيعرف ابدا وهو يقرى ابنة النيل ان هالكتاب له جزء سابق

المهم اني استمتعت وايد بقراية هالكتاب

بس للاسف ما اقدر الخصه لكم بسهوله لانه له جزء سابق وبالتالي يبيله شغلانه

عشان جيه بتنتظرون مده قبل ما يكون ملخص هالروايتين جاهز

وبحاول اني ما اتاخر واشد حيلي شوي:)

يلا الحين سي يو

انا رجعت

مسا الخير

الساعه الحين 2 الا8 دقايق ظهرا

حسب التوقيت المحلي لمدينة ابوظبي وضواحيها

طبعا اشتقتلكم وايد

رجعت من السفر من 5 ايام

بتاريخ 5\8

وطبعا الخمس ايام اللي فاتت كنت مشغوله وايد فما قدرت افضى للمدونه ابد

المهم..شهر كامل بره الدوله..كان شهر ممتع ومتعب بنفس الوقت

الانسان يوم يتعود على مكانه وعلى جوه الخاص صعب وايد يتاقلم فمكان غير

طوال الايام اللي فاتت كنت مشتاقه وايد للبيت ولمدونتي ولربيعاتي ولسيارتي ولكل شي تركته هني

احيانا ما نعرف قيمة الاشياء الا يوم نتركها

المهم اني رجعت لقواعدي سالمه الحين

وانتروا جديدي عما قريب

بسافر

مسا الخير

طبعا انا كائن ليلي

غالبا ما امارس نشاطي بالليل

لو تلاحظون ان اغلب اللي اكتبه يتم نشره مساءا

المهم

بغيت اخبركم اني مسافره عما قريب

وعشان جيه بنقطع عنكم خلال مدة سفري

اتمنى انكم ما تنسون مدونتي وتداومون عى زيارتها

وما تتركونها وحيده بغيابي

وان شاء الله عقب رجوعي من السفر بتواصل معاكم عبر هالمساحه اكيد

اتمنالك قضاء اجازه صيفيه ممتعه

والى لقاء قريب

العطر

رواية العطر من اروع روايات الادب العالمي

تدور إحداثها في مدينة باريس. وهي عن أمراه تعمل في محل لتنظيف الأسماك, وكانت حامل..للمرة
الرابعة..وجائها المخاض وولدت وهي فالمحل..وكانت دايما تترك المولود مع مخلفات تنظيف السمك..لحد ما
يموت وترميه مع المخلفات فالحاوية..مثل ما سوت بمواليدها الثلاث قبل وطبعا هالشي لأنه هالمواليد غير
شرعيين..وطبعا القانون كان بيعاقبها في حال تم اكتشاف هالشي.
المهم المولود الرابع لها..ما مات مثل ما كان مخطط له, بالعكس علا صياحه ولفت نظر الناس لحد ما اكتشفوا
الموضوع وطبعا كان جزاء إلام الإعدام شنقا فالساحة أمام الجموع , والولد تكفلت فيه الكنيسة وخلته بعهدة
مرضعة تربيه, واللافت بالنظر إن ما في أي مرضعة كانت تقدر تتحمل الطفل أكثر من أسبوع :لأنه كان نهم

جدا..وبغاية الشراهة ويأكل أكل طفلين..وكان هالشي يرهق المرضعة..اللي ترضع أكثر من طفل بنفس الوقت
لان هاي مهنتها بطبيعة الحال فكانت رضاعة هالطفل ترهقها وكانت ترجعه للكنيسة. وترجع الكنيسة تدور للطفل على مرضعة أخرى,ووحده من المرضعات قالت انه هالولد غير طبيعي وأكيد ابن الشيطان لأنه ماله رائحة مميزه مثل باقي الأطفال..وأنها على كثر ما أرضعت أطفال ما مر عليها طفل بدون رائحة مثل هالطفل الغريب
المهم بالنهاية استقر الطفل عند مرضعة وهالمرضعه إنسانه عمليه جدا وما عندها اعتراف أو فكره عن أي شي اسمه مشاعر وكان كل همها أنها تكسب فلوس عشان تؤمن لنفسها موته محترمه..يعني تموت على سريرها فبيتها يوم تكبر بالسن..ما تموت مثل ما مات زوجها بأحد المستشفيات الوضيعة ودفن بأحد المقابر الجماعية بعد أصابته بمرض معدي..وكانت فكرة إنها بتموت بنفس الطريقة اللي مات فيها زوجها بمثابة الكابوس عندها لهالسبب كرست كل حياتها بس عشان تامن لنفسها تنتقل بطريقه محترمه إلى مثواها الأخير والجدير بالذكر أنها ورغم كل عمرها اللي قضته تعمل على الهروب من هالمصير للأسف ماتت بنفس الطريقة اللي مات فيها زوجها ..وبنفس المكان بعد

المهم إن الولد بعد عاش عند المرضعة مده طويلة لين كمل الـ10 سنين تقريبا..وبعدها فكرت المر ضعه إنها أدت واجبها على أكمل وجه وانه دورها انتهى أكيد ودورت للولد على وظيفة يعتمد فيها على نفسه..وفعلا لقتله عمل فمحل دباغه وهو مساعد لاحد صناع الجلود

وطبعا صناعة الجلودد هذاك الوقت كانت وايد تقليديه وشي وايد خطير على طفل بهالغمر واغلب الاولاد اللي اشتغلوها كان مصيرهم المرض والموت بفتره ما تتجاوز السنه..بس لان هالولد فريد من نوعه ومحظوظ قدر انه يستمر بهالعمل بدون ما يتاثر الا تاثير بسيط..وطبعا فاتني قبل ها كله اقولكم ان هالولد كانت ححاسة الشم عنده قزيه بشكل فظيييييييع..يعني كان انفه دقيق ويشم اخف الروائح حتى المنبعثه من اماكن بعيده..لدرجة انه كان عنده القدره على الاستدلال على الاشياء بحاسة الشم فقط يعينبدون ما يعتد على النظر واليعون..وكان يميز الروائح بشكل غريب..ويعشقها.لدرجة ان العالم بالنسباله كان عباره عن مجموعه من الروائح بس..يعني ما كان يلفت نظره بالدنيا شي غير الروائح بس..المهم في احد المرات كلفه صاحب المحل بتوصيل مجوعه من الجلود الفاخره لاحد محلات العطاره المشهوره في باريس..طبعا الولد كان يموت فشي اسمه عطور ويوم دخل هالمكان دخل وهو بغاية الاضطراب وحاس كانه داخل مكان مقدس..وفورا بعد ماسلم الجلود لصاحب المحل طلب منه انه يشتغل عنده..وصاحب المحل طبعا استغرب هالطلب ورفض..وبعد طول نقاش اقنع صاحب المحل انه ممكن يحضر له خلطه لاحد اشه العطور اللي كانت موجوده فالسوق بهاذيك الفتره واقنعه انه يعطيه فرصه عشان يثبتله كلامه بالدليل القاطع ويصنع هالعطر جدامه..وفعلا خلاه صاحب المحل يقوم بالتجربه اللي طلبها وكانت النتيجه مذهله والولد نحج بتركيب العطر المشهور..وساعتها اقتنع صاحب المحل انه يشغله عنده لانه عرف ان هالولد نابئه وبيكون له فايده كبيره عليه..وفعلا اشتغل الولد عنده لمده من الزمن انشهر فيها المحل اكثر واكثر وتوسعت تجارته وذاع صيته بين البلدان وصارعليه اقبال كبير من الملوك وكبار رجال الدوله وطبعا ها كله بفضل هالولد الموهوب و بنفس الوقت بهالمده تعلم الولد على ايد العطار اهم اساليب استخراج العطور واستخلاصها وطبعا كان مستمع بشكل لا يوصف وكان ما يكل ولا يمل من تعلم كل اسرار هالمهنه وخفاياها بكل شغف

ومرت الايام على هالحال والولد قام يسوي تجاربه الخاصه لاستخلاص رائحه أي شي وكل شي ومره بعد ما فشل يستخلص رائحة احد المواد اللي رائحتها غير قابله اصلا للاستخلاص..حس بالياس والفشل..ومرض مرض خلاه طايح بالفراش لمده..وطلعتله بثور بشكل فظيع..وكانت حالته ميؤوس من شفائها والطبيب قال انه هالولد اكي خلال اسبوع بيموت..وفجاه وهو ينازع انفاسه الاخيره والعطار بجانيه طبعا حزين لانه بيخسر خسارة كبيره بوفاة هالولد..وفجاه وهم بهالحال الولد ساله هل في طرق ثانيه لاستخلاص العطور غير اللي هو تعلمها؟طبعا العطار قاله ان في طرق اخرى يستعملونها بمدينه ثانيه بعيده..وبعد ماس مع الولد هالشي تحسنت حالته بشكل مفاجئ..وطبعا هالشي اثار استغراب العطار بشكل كبير.واول ما تماثل الولد للشفاء قال للعطار انه نوى الرحيل للمدينه الثانيه عشان يتعلم المزيد عن وسايل استخلاص العطور..وطبعا العطار وافق بعد ما سجل اهم وصفات العطور اللي الولد اخترعها وطلب من الولد يتعهد له انه ما يبوح بسر هالوصفات لحد وانه ما يرجع ابد بعد لمدينة باريس..وطبعا الولد وافق على كل هالشروط..وانطلق في رحلته اللي امتدت لايام ووصل لمرتفع بركاني فيه كهف صغير قرر فجاه انه يستقدر فيه ويبعد عن عالم البشر وروائحهم اللي اتعبته وفعلا استمر عايش بهالكهف لمدة سبع سنين كان يتغذى فيها على أي شي يطيح تحت ايده يعني سحالي افاعي حشرات..اي شي..
المهم انه عبد 7 سنين قرر انه يترك الكهف ويستكمل مسيرته وطبعا اول ما بدا رحلته كان أي حد يشوفه يخاف من منظره الغريب لانه شعره كان طويل واضافره وملابسه مهترئه يعني باختصار كان شكله مخيف ويوم وصل المدينه الل ييقصدها سالوه الناس عن منظر منظره البشع قالهم ان في عصابه خطفوها وحبسوه بكهف وانه بعد 7 سنين قدر يهرب من الكهف بواسظة سلم تسلقه وان كان في قوى خففيه تساعده وتمده بالغذاء دوم..المهم انه قدر يقنعهم ويقص عليهم لانه عقولهم كانت وايد بسيطه هاك الوقت وكانوا يصدقون أي شي من هالقبيل..وعقب الولد نجح فالحصول على شغل عند ارمله تعمل باستخلاص العطور ويساعدها رجل ضخم نوعا ما..بيكون زوجها المستقبلي بعدين..طبعا الولد اشتغل عندها باجر زهيد ومقابل اقامته واكله بس..ومره اثناء تجاوله فالمدينه شم ريحه جميله اسرته وتم يتتبع مصدر الرائحه لين وصل لبيت وعرف ان هالريحه ترد لبنت ساكنه فهالبيت وقرر باي طريقه انه لازم يوصل لهالعطر اللي خلب لبه..ومع الوقت قاام يخنق أي بنت تعبه رائحتها وانتشرت اخبار جرائمها بالمدينه طبعا بدون ما حد يكون عنده فكره عن هوية الفاعل..وطبعا توالت الاحداث وتوالت جرائمه لين انتشر الرعب بالمدينه والناس خافت على بناتها خوف كبير خاصه ان كل ضحاياه كانن من البنات الصغار اللي جمالهم باهر ومن مختلف الطبقات واخيرا بعد جريمته الاخيره كشفو امره والقو القبض عليه وكان هذاك الوقت قدر يستخلص عطر يخلي اللي يشمه يقع تحت سطوته ويعشقه ويحب ويتيم فيه..وطبعا استعمل شوي من هالعطر في الوقت اللي كانو ماخذينه فيه للمصله اللي بيصلبونه فيها جدام الحشود..وبالمقابل اجتاحت الحشود حاله غريبه من العشق لهالمجرم اللي كانوا من شوي حاقدين عليه يوطالبون يقتله بابشع الطرق..وتبدل هالكره الكبير الى حب جارف قلب كفة الموازين وانقذه من الاعدام فاخر لحظه..بعدها ن جح فالهرب من المدينه لمدينه ثانيه واختلط بمجموعه من العامه واستعمل عطره الغريب ورش نفسه فيه..وساعتها تجمهرو هالمجموعه حواليه وبتاثير العطر عليهم حسوا انهم يحبون هالانسان بشكل رهيب ومب عارفين شو يسوون من فرط الحب اللي يحسون فيه لدرجة انهم قعدوا يتدافعون عشان يوصلوون له ومن شدة تدافعهم داسوا باقدامهم بدون ما يحسون لانهم كانو بحاله غريبه بتاثير من هالعطر الغريب وقامرا يشدونه بينهم لحد ما قطعوه قطعه قطعه..وكل واحد منهم خذ اللي يقدر عليه منه..وبالنهايه مات الولد..اللي كان سفاح كبير واسطوره غريبه في حب العطور:)
طبعا لا تشوفون التلخيص طويل تراه اختصار لفوق ال300 صفحه

BaCk

مساء الخير

طبعا غبت عنكم هالكم يوم اللي فاتو

لاني قضيت الويكند بره البيت

ورجعت لكم اليوم

اول شي بغيت اهني احد اقارابي بمنسابة افتتاحه لمنتداه اليديد اول امس

وهذا رابط المنتدى..اتمنى تشرفونا بزيارته

http://roo7bladi.freehostia.com/vb/index.php

من يومين تقريبا انتهيت من قراية رواية العطر وان شاء الله قريبا بوافيكم بملخص لها

حاليا يالسه اقرا قصه اسمها ابنة النيل

لكاتب فرنسي مولود في مصر

والروايه طبعا مترجمه

المهم هالروايه انا طبعا بعدني فبدايتها

وبصراحة هالروايه اوحتلي باني اسوي اسفتاء

موضوع هالاستفتاء هو

انت بنظر نفسك..انسان

تاخذ اكثر مما تعطي

والا تعطي اكثر مما تاخذ؟

خطر فبالي هالسؤال وحبيت تشاركوني فالاستفتاء

عشان نشوف كل واحد شو يشوف نفسه

من أي صوب؟

اترككم الحين

والى لقاء قريب

ارهقني هالموضوع

صباح الخير

بطلب من ناس عزيزه علي... اليوم بكتب هالموضوع

مع اني ما اعرف شو اكتب..والا من وين ابدى

خلني اول شي اعطيكم نظرتي عني

اوبمعنى ادق..عن انعكاسي في مرأة ذاتي

يعني مثلا..لو بغيت اعطيكم نبذه عني

او صوره مقربه لي

ما بقدر الا بشرح طويل

لاني خريطه مليئه بالرموز!!

عشان جيه .بدور اقرب كلمه ممكن تشرحني..!.

واقرب كلمه فبالي ممكن توصل المعنى اللي انا ابيه

اني انسانه ... (صعبه)

صعبه..صعوبة الحياه...

صعوبة النقاء بزمن الزيف و البراءة بزمن الخداع

صعبه..للاسف اعترف..ان واقع الحال جيه

اقدر اقول ان صعوبة الظروف والحياه خلقوا فيني هالكم الهائل من التعقيد

ما الوم أي حد يوم يوقف عاجز امامي بعض الاحيان

عاجر عن فهمي.. عن احتوائي..!

لان بداخلي كم هائل من التشابكات..!

واللي يساعدني على احتمال هالفوضى الداخليه بس

اني رغم لخبطت هالخيوط ورغم التناقضات

اقدر اتلمس طريقي فالحياه ادرك القواعد و القوانين و..افهمها لحد كبير

حتى لو كنت احيانا ما اتقيد فيها.. حالي حال الجميع

..........

مرات الحياه تقسى علينا وايد

وفاكثر سنوات تعبنا وحاجتنا لمرسى نرتاح فيه

او واحه نروي فيها ظمأنا الكبير

ما نلقي شي..!!

نلقى عمارنا ضايعين بوسط صحرا..

وتحت لظى شمسها تشوينا وتحرقنا

وتتجلى قسوة الحياه جدامنا بابشع صورها

ومثل حال الدنيا دايما..ما في شي يدوم ع حاله

تنفرج الازمه..ونشوف قوس قزح فجأه..ما نعرف حتى طلع من وين

وتستوي الحياه ورديه..وتتحسن الظروف

بس دايما.......القسوه تترك اثرها..اثر مرورها من هالمكان

عشان جيه تلقون هالاثر فيني

اثر واضح..للعيان..!!

مرات اتعب من نفسي..!

اتعب من محاولاتي اليائسه لردم هالشقوق

واستسلم

استسلم لتيار القسوه واخليه يجرفني

لانه تيار قوي ومقاومته تطلب مني جهد كبير

وطبعا اعرف ان استسلامي هذا محد يدفع ثمنه الا المقربين مني

لان قسوتي ما بتطلع الا عليهم

بس شسوي..للاسف ما فايدي شي!!

اعرف ان ها مش ذنب حد..انه يتحمل تقلباتي الحاده

بس يمكن القدر حطني فطريقكم كنوع من تكفير الذنوبJ

يعني وكحال كل مظلوم..احتسبوا عند الله الاجر والثواب

شر البليه ما يضحك طبعا

بس جد ما عندي شرح للموضوع

مرات يكون الزمن كفيل بمداراة الجروح

خلنا نترقب مع بعض..مفاجأت الحياه.

وشدراكم..ممكن تكون احلى من مفاجآت صيف دبي

كل شي يجوز..!

هديل الحضيف

مساء الخير

أول شي أحب اشكر كل اللي زار مدونتي

وأقولكم مشكورين ع الإطراء..:)

وأتمنى تزورون مدونتي دوم

وتلقون فيها كل جديد

اليوم أبا أتكلم عن هديل الحضيف..!

اللي أغلبكم ما يعرفها

ما اعرف لبش أبا أتكلم عنها اليوم

بس من أول ما خطرت فبالي سالفة إني أسوي مدونه

حطيت فبالي إني بتكلم عن هديل الحضيف كشي أساسي بالموضوع

طبعا هديل الحضيف أديبه سعوديه..

توفت من فتره بسيطة..ولم تتجاوز ال25 عام

توفت بعد اقل من شهر من عيد ميلادها الخامس والعشرين

والسبب..اممممممممم أهلها يوم حاولي يقومونها من النوم ما قامت

وعقب الإسعافات فالمستشفى دخلت بغيبوبة حوالي 3 أسابيع

وبعدين..

ماتت

فجأة جيه..بدون مقدمات..بدون سجل مرضي..بدون أي شي

المهم..إنا عمري ما عرفت هالانسانه ولا سمعت فيها قبل ما تموت

يا ترى لبش الموت دايما هو اللي يشهر الإنسان؟

يعني لو كانت هديل بعدها على قيد الحياة

بعد كم سنه يا ترى كنت بسمع عنها

أو بعرف إن في شي اسمه هديل الحضيف!!

طبعا هديل لها كتاب وحيد وهو عبارة عن مجموعه قصصيه

بعنوان ظلالهم لا تتبعهم

الكتاب إنا عن نفسي ما قدرت احصل عليه لين الحين

بس لي أمل إن شاء الله إني ألقاه عن قريب

واعدكم أول ما أقراه أعطيكم نبذه عنه

خاصة أني اعرف إن جيلي مش من محبي القراءة..ولا المولعين فيها

وكم يؤسفني هالشي!!

المهم أتمنى منكم اليوم كل من قرى موضوعي ما يطلع قبل ما يقرى الفاتحة لهديل

ويفكر انه إنا أو أنت أو أي حد

ممكن يستويله مثل ما استوى لهديل

هاي هي الحياة

عشان جيه لا تاجلون شي وتقولون باجر أو بعد سنه

لان محد يدري كم بيعيش

وبنفس الوقت قد ما تقدرون لا تخلون حد يكرهكم

ولا تكرهون حد..ترى الدنيا ما تسوى والله

واعملوا لآخرتكم..ترى العمر يمر على غفلة منا

وما يبقى من بني ادم غير العمل الصالح والسمعة الطيبة

وحطوا فبالكم..يا ترى لو كنتوا مكان هديل.

شو الشي اللي تتمنون لو إن الحياة أمهلتكم عشان تسوونه قبل ما تموتون؟

يوم أفكر بهديل..كيف الموت غافلها..أقول بخاطري يا ترى شو إحساس هديل الحين؟

وبنفس الوقت أقول..الحمد لله يا رب

على نعمة الحياة..!

الحـب

توني رده من النادي

بعد حصة ايروبيك محترمه

وما اعرف لبش خطر ع بالي الحين اكتب عن موضوع

اشوفه غريب..بس بنفس الوقت مهم

موضوع قديم.بس قديم متجدد..!

هالموضوع موضوعي هو

الحب

يا ترى شو هو الحب؟

متى نحب

ومنو نحب..ولبش نحب..!

وليش صعب إن الإنسان يعيش بدون حب

ليش البشرية منذ الأزل تتكلم عن الحب

إنا بالنسبالي الحب يبدأ من نفسي

لازم الإنسان يحب نفسه عشان يحب اللي حوالي

بحب نفسه..بعدين يحب الحياة

مرات نحس إن الحياة سيئة..قاسيه..مره..متعبه..!

ومرات نحس إنها ورديه.. حلوه..شيء ثمين..وتستحق أن تعاش..أو بمعنى آخر..تعتبر نعمه!!

يا ترى الحياة أي منهم..خير والا شر..حلو والا مر؟

الحياة مزيج من الاثنين

مزيج غريب

مزيج مرات تزيد نسبة السكر فيه

ومرات تزيد نسبة الملح

فالحالتين

إحنا مجبورين إن إحنا نتجرع هالمزيج

وإحنا مبتسمين

أو الأقل..قنوعين..أو راضيين

اللي جرب الإحساس بالرضا وقت الشدة يعرف انه إحساس جميل

الانسا ن عنده القدرة إن حتى المرارة يلقى فيها شي حلو

تحس بالانتصار..انك تنتصر على الحياة..انك قدرت تبتسم حتى وانته بأزمة

معنى هالشي انك قوي...

يعني تستحق الحياة!!

معناه انك كنت اقوي من انك تسحقك الحياة

وسط ملايين المسحوقين

بالنيبالي ..الطريق للحب يبدأ من انك تحب الأشياء البسيطة اللي فحياتك


وتدور على أشياء حواليك تحبها


وتحاول تلعب لعبة السعادة..اللي كانت تلعبها بوليانا..مادري عاد تذكرونها والا لا

حب الأشياء الصغيرة اللي تشكل حياتنا..هو اللي يخلينا نحب حياتنا كلها بعدين..حب كبير!!

ما اعرف لبش طرأ فبالي موضوع الحب الحين

يمكن لأنه الشغل الشاغل للكثير من الناس

اترككم الحين

ولي عوده

اعجبتني:)

هذا قلبي ...

وأظن قلبي ... غني جداً عن التعريف

هنا أحفظ كل أحبابي ... بدون ترتيب أو تصنيف

هنا الأرشيف ...

هنا تلقى ... صور أصحاب ما بيني وبينهم تكليف

... هنا تلقى ... قصص حبٍ قتله الغش والتزييف ...

هنا ... باب صغير لكل من حب لجروحي يضيف

... هنا حكمة ... تقول إن الحزن والحب يزيدان البشر تثقيف

... هذا قلبي ... وأظن قلبي غنياً جداً عن التعريف ....

شخبطه..من مسودات تليفوني

مضى امسي

واعيش اليوم اتذكر

وبكره يا ترى من لي

وشو مخبي

وراح الوقت من ايدي

وضاعت احلى سنيني

وحتى اللي بقى منها

مضى مني!!

سويتها..!

مساء الخير

الساعه الحين 2 وثلاث دقايق

ظهرا

سويتتها واشنات مدونتي الخاصه!!

بدون سابق انذار

اتمنى انها تكون تجربه موفقه لي

واتمنى اني اكون فتحت لنفسي بوابه تطل على عالم جديد

وممممممممممممممم..وبس