30‏/12‏/2008

غزه....واصبحنا بلا عزه !











طبعا لا امتحانات ولا اي شي فالدنيا








ممكن يخليني ما أنتبه للي قاعد يصير








احيانا ما في كلمات تعبر عن اللي فالقلب








ليت الموت خذني قبل ما اشوف كل هذا








يا ترى لين متى بيتم هذا حالنا؟








يعني ما في للظلم الحدود








حسبنا الله ونعم الوكيل








حسبنا الله ونعم الوكيل








حسبنا الله ونعم الوكيل









كلمه تغني عن اي قول

20‏/12‏/2008

سـ(أغيب)ــ قليلا..!


مساء الخير
.
.
شحالكم عساكم بخير؟
.
.
بغيت أخبركم إني بغيب هالفترة
.
.
لان إمتحانات الكورس الأول ما باقي عليها شي
.
.
فبناءا عليه..لازم اعلن حالة الطوارئ القصوى
.
.
واعتكف إعتكاف تام، وأوهب نفسي للتعليم!
.
.
طبعا فالايام القادمه ما بدخل النت
.
.
إلا بفترات قليلة
.
.
غالبا ما بتكون مسروقة من ساعات الدراسه اكيد!
.
.
طبعا بخصوص امتحان ICDL الأخير
.
.
ابشركم...
.
.
انا ما امتحنت اصلا :)
.
.
طبعا السبب ان مدرستنا سافرت في اجازة
.
.
وما في حد بديل لها يشرحلي اي شي ابيه
.
.
بالتالي قررت اني أءجل الامتحان شوي
.
.
لين اخلص امتحاناتي الفصليه
.
.
وبعدين ارد افضى للإمتحان الاخير
.
.
وأما بخصووص الريجيم
.
.
هالاسبوع نزلت كيلو احد فقط لا غير
.
.
وبديت طبعا الحين ريجيم التثبيت
.
.
اللي بستمر عليه لمدة اسبوعين
.
.
والحياة مستمره بالتأكيد :)
.
.
المهم إن إمتحاناتي بتبدأ 29/12
.
.
وبتنتهي بتاريخ 12/1
.
.
وقبل هالتاريخ
.
.
لا تتوقعون تلقون عندي تدوينات يديده
.
.
اعتبروا المدونة غير قابلة للتحديث
.
.
حتى اشعار اخر..!
.
.
دعواتكم لي :)

.
.
(طبعا هالتدوينه قابله للتحديث)

كلمه اخيره

الحروف الملونه بالوردي هي الحروف اللي يتكون منها إسمي شفتوا النرجسيه لووووول

15‏/12‏/2008

دامت دياركم عامره بالأفراح





مساء الخير

شحالكم عساكم بخير :)

اكيد تعودتوا على تدويناتي المتأخره

طبعا تعددت الاسباب والنتيجه واحده

المهم..كنت من يومين بعرس

وهالعرس هو اللي اوحالي بفكرة هالتدوينه

طبعا بعضنا غير متزوج و البعض الآخر متزوج


بالنسبه للمتزوجين..يا ترى شو رايهم بالزواج


ايجابياته اكثر والا سلبياته؟

وهل حسيتوا بيوم انكم ندمتوا لانكم تزوجتوا ؟

وبالنسبه لـ غير المتزوجين

شو نظرتكم عن الزواج ؟

شو شروطكم الاساسيه في شريك حياتكم؟

هذا بخصوص العرس


من ناحيه ثانيه اثناء إبحاري في النت

عيتني احدى المدونات اليديده

وكنوع من تشجيع شركائنا الجدد في عالم التدوين


حبيت تشاركوني في نصفحها

على الرابط التالي




وان شالله تنال على اعجابكم")


،،،،،،،،،،



ريجيمي لين الحين مستمر للاسبوع الرابع على التوالي


لين الحين نزلت 7 كيلو ونص والمسيره مستمره :)

على صعيد اخر :) امتحاني الأخير اللي رسبت فيه قبل العيد

بعيده ان شا الله يوم الخميس،،دعواتكم لي :)


واراكم قريبا..


همسه مختاره

لاتُفْشِ سِرّا ما اسْتَطَعْتَ إلى امرىء ٍ

يفشي إليك سرائراً يستودعُ

فكما تراه بسرِّ غيركَ صانعاً
فكذا بِسِرِّك لاَ مَحَالَة َ يَصْنَعُ
تحديث(1):
مبروك لـ بوش الهديه الطائره..وعقبال كل اللي يستاهلون لوووول:)
تحديث(2):
ليش كـلـكم عندكم يقين اني غير مرتبطه يا ترى؟ مع اني ما تطرقت ابدا لهالموضوع : )

07‏/12‏/2008

كل عام وانتم بخير


مسائكم ورد
كل عام وانتوا بألف خير يارب
عيد سعيد
وعساكم من العيادين والسالمين
اتمنى للجميع قضاء وقت طيب فالعيد
وترى احلى ما في العيد صلة الرحم
وان الواحد يتلاقى مع اهله واصدقائه
وكل من يعز عليه :)
ويحتفل معاهم بهالمناسبه الحلوه
تمنياتي بقضاء عيد مميز
والله يرد حجاجنا بالسلامه يا رب
يلا اشوفكم بعد العيد :)

01‏/12‏/2008

عاد عيدك يا عسى عيدك يعود


مساء الخير
اعرف اني طولت الغيبه عليكم هالمره
بس تدرون العيد قرب ومشاغل العيد ما تخلص
المهم ان هالسنه عندنا العيد عيدين
لانه بعد يومين بنحتفل بمرور 37 عام ع قيام الاتحاد
ودولتنا الحبيبه بتطفي بذلك شمعتها السابعه والثلاثين
العمر كله يا اغلى وطن..وان شالله في كل سنه في تطور وازدهار اكثر يا رب
هالسنه كان خاطري ازين سيارتي
كنوع من الاحتفال يعني بالعيد الوطني
(للعلم بس تراها إلا فكره انا ما طبقتها ابد لا تخافون لووول )
طبعا اول ما شفت ردود الفعل بعد ما نطقت بالفكره
كنسلت الفكره نهائيا وحقدت حقد شنيع ع الاولاد
لان هم حلال عليهم يسوون الحركات اللي يبونها بسياراتهم
واحنا البنات عيب ممنوع حرام :(
انزين انا بعد ابا اعبر عن فرحتي بالعيد
والا العيد عيدكم انتوا يعني بس؟
المهم ما علينا...طبعا يمكن ما عندكم فكره اني بديت اسوي ريجيم
من حوالي اسبوع او اكثر شوي
وابشركم ان وزني نزل 4 كيلو الا ربع هالاسبوع
طبعا نتيجه مرضيه بس جد الريجيم تعذيب
والبنات طبعا ادري انكم بتسلوني عن نوع الريجيم
بجاوبكم مسبقا انه ريجيم بروتيني
يعني عباره عن لحوم وخضراوات بس بدون حتى فواكه
واكيد بدون خبز ومعكرونه وعيش( ارز) وسكر
وطبعا في دوا يستعمل قبل كل وجبه : )
ولأهل الامارات ترى الدكتور واااايد ممتاز(اسويله دعايه ببلاش هههههه)
المهم اللي يبى يستفسر عنه ما عندي مانع ترى بس بعرف ساعتها انها دبه او دب
لووووووووووووول ع العموم من الحين عشان مايروح بالكم بعيد
بخبركم معلومه وهي ان كل اللي يعرف اني مسويه ريجيم
يستغرب ويستنكر ويشجب هذا التصرف العبيط مني
لان ع قولتهم مش محتاجه ريجيم
بس ع قولتي انا في كم كيلو ابا افتك منهم
وبعدين برجع الى حياتي الطبيعيه خلاص :)
المهم الساعه 2 مساءا الحين وانا لازم انام خلاص
يوم الخميس اخر امتحان عندي
فدورة الاي سي دي ال..ادعولي لا تنسون
التدوينه قابله للتحديث..يلا سي يو :)

22‏/11‏/2008

اخر الليل

مساء الخير
شحالكم عساكم بخير
طبعا هالتدوينه تأخرت شوي لحد ما نزلتها
لأني ما كنت اعرف كيف انزل مقطع الفيديو
بس اخيرا والحمدلله بس ما تلقيت مساعده خارجيه!
ضبط معاي الموضوع واشتغل الفيديو
ان شالله عاد بعد هالتعب الانشوده تعجبكم
اترككم معاها




(اخر شخبطه)
طريق طويل
طويل وخطوه بخطوه
انا امشيه
وعمر بالغصب والطيب
انا اعيشه
ودرب ممتلي بأشواك
اهرول فيه
وتجرحني
وتدميني
دبابيسه..!

للي سأل عن امتحاني للاسف رحت المعهد وبعد ساعه كامله من الانتظار قالولنا ما في امتحان لان سيرفر الموقع الخاص بالاي سي دي ال ما اعرف شو فيه !! طبعا انواع الاحباط خاصه ان ما باقيلي الا هالمادتين ابا اخلصهم وافتك قبل العيد بس شسوي قدر الله وماشاء فعل! المهم الوقت تأخر وانا عندي معهد باجر يعني حان وقت النوم يا اصدقاء لووووووووول:)

14‏/11‏/2008

يوميات


مساء الخير



شخباركم عساكم طيبين؟



اليوم بستعرض معاكم كل شي سويته هالاسبوع



ببدى من يوم السبت



طبعا هاليوم كان يوم سيئ نوعا ما
للاسف .قمت ع صوت المنبه كان المفروض
اتجهز واروح المعهد أخذ الحصه الاولى من
مادة الباور بوينت،بس لان مزاجي كان
بغاية السوء كنسلت الفكره لاني كنت
متأكده ان هالمشوار ما منه فايده لان
مزاجي التالف ما بيخليني اقدر استوعب
اي شي!بالتالي طفيت المنبه ورجعت نمت!
وفالليل رحت مع امي لموعدها مع دكتور
التغذيه والحمدلله كان المشوار موفق:)
واحنا رادين البيت كان خاطري فايس
كريم من باسكن روبنز بس طبعا ما
سوولي سالفه وما إشترولي شي
وسوولي طاف!



يوم الأحد



قمت الصبح من وقت طبعا تجهزت
وتلبست وفورا للمعهد خذت الدرس,
وكنت (مبلمه) وايد ما اعرف ليش!
حتى المس مستغربه مني تقولي شو
فيج استيعابج قل فجأه جيه!
قلتلها اني متضايقه شوي:( ..
المهم خلصت الحصه ورجعت البيت
وكان يوم عادي وايد ما صار فيه
اي شي يذكر غير انه معنوياتي
كانت داااااون وكان مالي مزاج
لاي شي! الشي الوحيد اللي اذكره
اني هاليوم نمت الساعه 8 ونص
فالليل وتميت راقده لين 7 الصبح
ثاني يوم!اللي هو صباح الاثنين



يوم الاثنين



قمت طبعا وانا نشيطه وشبعاااانه نوم
تريقت وقعدت ع النت شوي انتظر
وقت المعهد وع الساعه 9ونص تليفوني
رن بشكل متكرر كانت المكالمه من
المعهد يبلغوني فيها ان الحصه
اليوم تكنسلت لان المس غايبه!
طبعا انا واعيه من الصبح بانتظار
وقت الدوام وكل ها طلع ع الفاضي
اخر شي،وطبعا كنت فقمة نشاطي
وما عندي اي إستعداد اني اقعد فالبيت
فقعدت افكر ويييين اروح عقب
تذكرت اني ما رحت بيت عمي
من زمان قلت يلا وفورا ركبت السياره
والى هناك..يلست نص ساعه
عقب رجعت البيت،وخششش بعد نمت
وقمت 4العصر و تلقيت عزومه
على حفلة عيد ميلاد اخر الاسبوع,
فقلت يلا خلني اسير السوق اشتري
هديه للعيد ميلاد،وطبعا الهديه
اللي فبالي ما لقيتها بسهوله..
درت بأكثر من مكان لين حصلت
على مبتغاي..تعشيت وشريت ايس كريم
من باسكن روبنز اخيرا :)
وبعدين رجعت البيت وخششش نمت





يوم الثلاثاء



كالعاده صباحا المعهد..
المس عاد هاليوم انفجرت فيني
لانها حست اني امر بفترة بلاهه
ذهنيه فظيعه..قالتلي انها هالاسبوع ما
بتسمح لي امتحن لانها ما تتحمل صدمة
رسوبي!وقالتلي ان الافضل لي اني اوقف
هالاسبوع وما امتحن اهون من اني
ارسب! طبعا انا صدمت للفكره وحسيت
اني صدق مصختها وان الموضوع شكله يمكن
يقلب جد فقلت يا بنت بسج استهبال
وركزي شوي،فقلتلها عطيني فرصه اتمرن
هاليومين واراجع فالبيت وان شالله
بيتحسن مستواي وبرد مثل قبل،وأول ما
طلعت من المعهد مريت ع امي وسرنا
العياده عشان ناخذ نتايج تحاليلها الدم
والحمدلله طلعت كلها زينه بس طلع عندها
ارتفاع بالكليسترول وعقب ما شفنا
الدكتوره رجعنا البيت،خذت انا لابتوبي
ورحت للمعهد مره ثانيه عشان يسوونلي
عليه شوية تعديلات واقدر اتدرب عليه
،وبعد ماعدلوه ورجعت البيت قعدت
اتدرب لين حسيت اني راضيه
ع مستواي وبعدين نمت قريرة العين:)



يوم الأربعاء



اللي هو اول امس :)
كالعاده المعهد صباحا
،بعد المعهد رديت البيت،
والعصر العياده مع امي موعد اسنان
هالمره,حوالي ساعتين فالعياده
بعدين عوده الى البيت،شوية تدريبات وتجهيزات
لإمتحان الغد.وسهره حلوه مع شخصيه من
الشخصيات المحببه الى قلبي ع المسنجر وموضوع
النقاس حوار الديانات لووووول
بعدين ع الساعه 2 فالليل نمت
ولين الساعه 12 الى ربع من صباح الخميس





يوم الخميس



طبعا قمت من النوم ع اتصال
صديقه لي استغربت ان بعدني
نايمه لهالوقت! طبعا امتحاني الساعه 1 الظهر
عشان جيه خذت راحتي بالنوم بهاليوم.
طبعا تجهزت وطلعت ع الساعه 12 ونص
من البيت،انا والسياره يوعانين،
وطبعا لان أفالونتي العزيزه غاليه على قلبي
قررت ابديها عن نفسي واروح قبل ما اتريق
اعبيها بترول،بعد ما اتخمت السياره بالبترول
رحت طلبت براتا بالبيض والجبن من الكفتيريا
مع كوب شاي احمر طبعا هاي سياسة تدليل الذات
اتبعها مع نفسي ايام الامتحانات
عشان اييب درجه حلوه:)
وهالمره ولله الحمد هالسياسه نفعت
ويبت فالامتحان 92:) بعد ما خصلت الامتحان
رجعت البيت طبعا المعنويه مرتفعه
والابتسامه شاقه الحلج ووداعا للاكتئاب:)
قعدت مع امي شويه والا اسمعها تقولي
انه خاطرها تتحنى،وبما ان احنا معزومين
اليوم على عيد ميلاد قلتلها يلا الصالون ترى
ما ورانا شي فاضين لوووووووول
طبعا اعتبرت الحنه مظهر من مظاهر الاحتفال
بنجاحي بالامتحان :)
طلعنا من البيت ع الساعه 3 وربع الظهر
تحنينا و5 ونص كنا راجعين البيت
،سبع ونص سرنا العزيمه تمينا هناك
لين الساعه 11 وبعدين ردينا البيت
قعدت شوي ع النت وبعدها خششش نمت



الجمعه اللي هو اليوم



قمت من النوم الساعه 10 الصبح
فورا قعدت ع النت وبعدين تسبحت
وشربت دلة شاي كامله وقعدت افكر
بموضوع التدوينه اليديده اللي بنزلها:)
تذكرت ان باجر عندنا ضيوف
وبيكون يوم حافل بالأحداث بالتالي
ما بيكون عندي وقت اهتم بمدونتي العزيزه
فقلت لازم استغل الوقت اليوم لان باجر
ما في امل جدولي فل :) وكتبتلكم هالموضوع
اللي لو قريتوه من اوله لين اخره
يعني صدق انتوا ناس صبورين لوول


(بعد ما كتبت التدوينه وانا اراجع الاخطاء اللغويه وصلني خبر وفاة ابو مرت عمي،طبعا ما قدرت اكمل التدقيق اللغوي وانزل التدوينه ورحت فورا بيت عمي ،من 5 العصر لين 10 فالليل وتوني و اصله البيت من ساعه هاليوم كان شاق وباجر بعد وراي عزا ادعوا للمرحوم بالرحمه!)

08‏/11‏/2008

تاج






مساء الخير..كنت اعتقد إن التاج للملوك والعرايس فقط :)


بس اكتشفت إن في تاج بعد للمدونين

وبما اني من كم يوم تلقيت تاج من الاخ mohamed ghalia


فقلت لازم اجاوب ع الاسئله اللي فيه مثل ما وعدته


وهذا بيكون موضوع التدوينه اليوم :)





السؤال الأول:ماهى السعادة من وجهة نظرك؟


السعاده..السعاده هي راحة البال..انك تكون مرتاح نفسيا..تكون مش ظالم حد..ومش مظلوم بعد :) ان احتياجاتك الاساسيه في الحياه تكون موجوده..وما تحتاج لاي انسان..وان ربك يكون راضي عنك وتكون انت راضي عن نفسك بعد






السؤال الثانى: كيف تصل إلى السعادة؟


اصل للسعاده يوم اسوي كل واجباتي وألتزم بالخط اللي رسمته لنفسي واكون راضيه عن نفسي وعن علاقتي بربي وعلاقتي باسرتي وعلاقتي بالناس:)




السؤال الثالث: هل السعادة وهم أم أنها حلم صعب؟


مش وهم اكيد..يمكن حلم صعب!




السؤال الرابع: هل السعادة طريق للنجاح ؟وضح؟


طبعا السعاده طريق للنجاح,يوم تكون سعيد طاقة السعاده هاي تدفعك لانك تسوي اشيا وايد ما تقدر تسويها بحالاتك الطبيعيه,السعاده تمدنا بالطاقه اكيد وتخلينا نسوي اشيا فوق المعقول قياسا لطاقاتنا العاديه:)




السؤال الخامس: ماهى أكثر اللحظات التى شعرت فيها بالسعادة؟


بصراحه!..مابا اكون كئيبه!...بس جديا ما اذكر!





السؤال السادس:هل ممكن أن تحقق كل شىء؟


مستحيل..! ما في انسان فهالدنيا ممكن يحقق كل شي لان ببساطه..الله ما خلق الدنيا عشان الانسان يرتاح فيها..لازم يكون شي ناقصه..كنت اتحاور مع نفسي من شوي بهالخصوص!كنت متضايقه من جوانب النقص اللي فحياتي بعدين سالت نفسي..يعني انا ابا اخذ كل شي؟حسست نفسي اني طماعه..وذكرت نفسي اني عايشه فالدينا مش فالجنه!! لو قدرنا ناخذ كل شي فالدنيا..عيل شوبيكون الفرق بينها وبين الجنه؟ بتكون الدنيا ساعتها جنه..وها شي طبعا مستحيل :)




السؤال السابع: السعادة تجعلك تقبل على الحياة أم لا؟

اكيد طبعا السعاده تخليني اقبل ع الحياه وتعطيني حافز اكبر على مقاومة صعوباتها وعلى الاستمرار:)




السؤال الثامن: هل أحسست يوما انك وصلت لقمة السعادة؟


هالشي اتذكره لاني حسيت فيه من مده قريبه..يوم شعرت اني قدرت اسعد امي وادخل ع قلبها السرور,وها شي يعنيلي الكثير..واعتبره قمة سعادتي,واحمد الله واشكره انه قدرني وقدرت اسويه




السؤال التاسع: لماذا تمر أوقات السعادة بسرعة؟

ما ادري فعلا..والدليلل اني ما قدرت اذكر اي لحظة سعاده مر عليها مده!يمكن دايما الشر اقوى من الخير,وبالتالي الحزن بعد اقوى من الفرح,والدليل ان احنا ما ننسى لحظات الالم ابد وتتنحفر بذاكرتنا حفر الى امد بعيد




السؤال العاشر: هل ترى السعادة فى التدين؟


اكيد :)




السؤال الحادى عشر: هل أنت متفاؤل وعندك أمل؟وضح؟


الحمدلله..لانسان بدون تفائل ..مايقدر يكمل دربه بالحياه..وبدون امل..ما يقدر يعيش..الامل بالله دايما يسهل كل الامور..يعني لو ما تسلحنا بالامل بنستسلم امام اول عقبه تواجهنا فطريقنا,وبالتالي بنبقى محلك سر,الامل دوما سر النجاح





السؤال الثانى عشر: إذا شعرت بالحزن ماذا تفعل؟


غالبا اتناقش مع نفسي..واقعد ادور ع سبب الحزن,اذكر نفسي بالنعم اللي عندي..لين يتحسن الحال واحيانا لو كانت الحاله مستعصيه..ممكن اصيح!(يعني اعيط او ابكي)..وغالبا بهالحالات افضل انام..لاني اكون عصبيه وايد يوم اكون حزينه..فالافضل اريح اللي حوالي مني وارتاح..ومافي احسن من النوم كحل مثالي اكيد :)






السؤال الثالث عشر: هل يستمر معك الحزن فترة ام ينقضى فى الحال؟


حسب سبب الحزن..مرات يطول ومرات لا..بإعتقادي غالبا كل انسان يقدر يتحكم الى حد ما بمدة حزنه..يعني لو شغل نفسه وما حاول يفكر بالموضوع اللي يضايقه..اكيد بنسى بسرعه..ومشاغل الحياه خير كفيل بهالشي :)




السؤال الرابع عشر: ما رأيك فى الأفراد المتشائمين؟


اكيد الله يعينهم..لانهم يضرون انفسهم بالدرجه الاولى,وياثرون عللى اللي حواليهم تأثير سلبي اكيد..انصحهم طبعا يتفائلون..لان الحياه اكيد حلوه..بس هم لازم يغيرون نظاراتهم عشان يقدرون يشوفون الجمال اللي فيها..وما ينسون ان عندهم رب كريم..رؤووف رحيم:)



اتمنى اكون جاوبت.وكفيت ووفيت مثل ما يقولون:)..وشكرا لصاحب التاج.

31‏/10‏/2008

هذيان من ارشيفي





مساء الخير..اليوم حبيت اشارككم بخاطره قديمه نوعا
ما..كتبتها من فوق الـ3 سنوات تقريبا

هي كئيبه نوعا ما..وغريبه اكثر..كتبتها بفتره كنت

اعاني منهامن مشاعر متضاربه..خاطره غامضه :)


الـخاطره بعنوان


هذيان




كما تمضي بنا الايام

يمضي ها هنا عمري


فأكبر تصغر الاحلام



ويبقى ها هنا جرحي


وامنية بها اغفو


وابحر في سماء الغد


فوق مراكب الذكرى


وبين المد و الجزر


ثابتةً هي الشكوى


ويبقى طيف امالي


يداعب نشوة الفكره


ترى هل ادخل التاريخ


ام ابقى بلا عبره؟


وماذا يعني لي التاريخ


سوى اوراق تقويمي

سوى ارقام


كم تجري


بلا جدوى


اتبحث عن خيال ضاع


ام تستأنس العدوَ؟

26‏/10‏/2008

أحاسيسي






بما ان اليوم يوم خاص في تاريخ مدونتي,حبيت اكتب لكم اليوم اي شي يدور فبالي,مثلا ابرز الطباع اللي اشوفها فيني,كل انسان فينا له طريقة تفكير معينه,ويتأثر بأشخاص محددين اكثر من غيرهم,أحاسيسنا بشكل عام تختلف وايد باختلاف ساعات النهار احيانا,في ايام نلقى فيها مشاعرنا تطغى عليها السلبيه,واحيانا العكس.
كل واحد فينا له مشاكله الخاصه فيه..همومه..متاعبه..مسؤولياته الخاصه فيه.
اليوم بحاول احدد اكثر النقاط اللي تشغل تفكيري بشكل عام..والامور اللي تمس مشاعري بشكل مباشر,فالبدايه انا انسانه عصبيه نوعا ما,حساسه,سريعة التوتر والانفعال,طموحه وايد,عندي احساس فظيع بالمسؤوليه ماأعرف ليش
احن للماضي بشكل كبير,احسه مرضي احيانا,جديه نوعا ما.اكثر طبع اكرهه بحياتي الاستهزاء!طبعا ها كله نقطه ببحر ولو اتم اتكلم عني ما بخلص اكيد-اليوم ع الاقل-وماخفي كان اعظم طبعا,اكيد بتعرفوني اكثر مع الايام.
اقدس الصداقه وايد,واحب احتفظ بصداقاتي على المدى الطويل,حتى بنات المدرسه على علاقه بوايد منهم لين الحين,بما ان ما عندي خوات,احب اكون وايد صداقات,ودايما صداقاتي تاخذ مساحه كبيره من حياتي,قرأت مره فموضوع ان الطفل الوحيد يكون وايد اجتماعي ويحب يجمع حواليه عدد كبير من الاصدقاء لانه يخاف وايد من شبح الوحده بيني وبينكم استانست(فرحت) يوم قريت هالموضوع لاني عرفت ساعتها ان المشاعر اللي احس فيها وايد طبيعيه وان كل الناس اللي ما عندهم اخوان مثلي يحسون بهالاحساس:لاني كنت مقتنعه بفتره سابقه اني وايد مكبره هالموضوع واني سويت لنفسي عقده بدون ما احس! بعدين يوم عرفت ان طبيعي اني افكر بهالطريقه تنفست الصعداء وقلت الحمدلله طلعت سليمه انا يعني,لاعقد ولا ما يحزنون:)
الحياه ما تعطي الواحد فينا كل شي,واكيد الله-سبحانه وتعالى- يختار لنا احسن الاشياء اللي تناسبنا,يقولون لو علمتم الغيب لأخترتم الواقع,بالتالي الواحد يحمد ربه ع كل شي.ما بطول عليكم,ولي عوده قريبه باذن الله.
ملحوظه:بعد ما انتهيت من كتابة الموضوع,وقبل ما انزله تحديدا,سويت باك بالغلط!.وتخيلوا عاد انمسح كل اللي كتبته:( صراحه تحطمت..وقلت مستحيل لو شو ما صار ارد اكتب الموضوع مره ثانيه..بعدين رحت للمسودات والحمدلله لقيت الموضوع موجود..
اي لف بلوجر خخخخخخخخخخ :)

25‏/10‏/2008

انا عندي مشكله:(

مسا الخير..اول شي بكلمكم عنه اليوم..هي مشكله باااطه جبدي(مطلعه عيني للاخوه المصريين)طبعا يوم بتعرفون شو هي..بتكتشفون انها تافهه,هي تافهه بالنسبالكم اكيد..بس بالنسبالي انا لا..مهمه وايد اكيد.مشكلتي الله يسلمكم اني من سويت هالمدونه لين هاليوم,ما اقدر ادرج اي صوره بأي موضوع!!طبعا لا تتحرون السبب اني ما اعرف كيف للاسف..انا اعرف..بس المشكله اني كل ما حاولت اطبق هالشي..ما يصير.كل ما اضغط على الايقونه اللي المفروض احط رابط الصوره فيها الايقونه اصلا ما تنفتح!!ما اعرف ليش !! قلت يمكن العيب بجهازي..جربت ودخلت من جهاز ثاني..نفس الخطوات ونفس النتيجه للاسف:(..وبالتالي نفس الاحباط,مادري بصراحه شو الحل..تعبت من هالموضوع,يا ليت لو حد فيكم يقدر يساعدني..ما يبخل علي بيد العون:)

تحديث:اسفه ع الخطأ الغير مقصود..كل مره ع هالحال..التعليقات تكون مغلقه بشكل اوتوماتيكي وانا ما انتبه..معلش..مدونه يديده نسبيا..اعذروني@@