25‏/02‏/2009

@ سمي قبل ما تدخل @


.
مسااااااااااااااء الخير

.

من حوالي ساعتين

.

دخلت المدونه وقلت يا بنت عيب

.

لازم تنزلين تدوينه جديده

.

لان اخر تدوينه نزلتها

.

اكل عليها الزمان وشرب خلاص

.

المهم حاولت اعتصر افكاري

.

واستجدي الكلمات

.

ولكن بدون فايده

.

لا حياة لمن تنادي

.

فقررت اني اهجر الكتابه واتجه للسرير

.

وامارس هوايتي المفضله..

.

اللي هي طبعا النوم

.

طبعا انا كل ما ابا انام..سبحان الله

.

الحاسه السادسه عند ربيعاتي تشتغل

.

القى التليفونات تتابع من كل حدب وصوب

.

فبالتالي...ملاك النوم يمل الانتظار

.

ويذهب الى حد ثاني..يقدر قيمته،ويعطيه مزيد من الاهتمام

.

مش ناس مثلي تتركه ع الويتنج

.

المهم...بعد ما خلصت بربره ع التليفون

.

حاولت انام...اتقلب يمين..اتقلب شمال

.

ما في فايده

.

اخر شي يأست وقلت يا بنت عوضك ع الله

.

طبعا شو ممكن اسوي بهالليل

.

غير اني اجابل مدونتي الحبيبه؟

.

دخلت اول شي ع الايميل

.

لقيت رسايل جديده

.

فتحت وحده منهم..وهالرساله

.

كانت السبب..بهالتدوينه اللي اكتبها الحين

.

الرساله الله يسلمكم تحوي رابط

.

هالرابط اختبار ذكاء..يقيس نسبة ذكائك

.

وانا طبعا بكل تهور سويت الاختبار

.

والنتيجه ما بخبركم عنها الا بعد كم يوم

.

بتلقون تحديث اكتب فيه نتيجتي

.

طبعا هالشي بعد ما تكونون انتوا يا زواري الكرام

.

خبرتوني بنتايجكم المفرحه

.

فلذلك وبناء عليه..:

.

يرجى ممن يجدون في انفسهم الثقه والكفاءه على التقدم للاختبار

.

النقر على الرابط ادناه..مع البسمله مسبقا

.


.

.

مع تمنياتي بالتوفيق للجميع

.

ويا ويله يا سواد ليله

.

اللي يكتب لي رده الكريم

.

ويكون الرد غير مسبوق بالنتيجه

.

يلا لو سمحتوا اوقفوا طابور

.

خلينا نشوف النبووووووووووغ

.

بسمه تعالى نبدا..:



ملحوظه: الحروف الملونه تعبر عن احساس احسه حاليا!

تحديث: ما لاحظتوا ان محد فيكم اهتم بالحروف المعبره عن احساسي؟
يمكن لانكم فجعتوا بنتايجكم المفرحه..عموما..كما وعدتكم انا يبت 4
في الاختبار ، ذكاء اقل من المتوسط لووووووووول

13‏/02‏/2009

اخر الاخبار




صباح الخير

.

شحالكم عساكم بخير ؟

.

طبعا اليوم بخبركم بشكل موجز نوعا ما

.

عن ااخر تطوراتي :)

.

من يومين اللي هو يوم الاربع اللي فات

.

رحت الشارقه..طبعا هاي اماره تبعد عن بوظبي حوالي ساعتين

.

كان عندي شغل في احدى الوزارات

.

وبما اني ما ادل اي شي

.

وبما اني سبق ان حاولت اني اوصل للمكان اللي ابيه بجهودي

.

بدون الاستعانه بأحد..ومحاولاتي هاي كانت تبوء بالفشل الشنيع

.

لهالسبب قررت هامره اني اول ما او وصل الشارجه

.

اوقف سيارتي بأي مكان

.

وآخد تاكسي يوصلني بسهوله وامان..للمكان اللي انا ابيه :)

.

طبعا بركنت في احد الباركنات الرمليه..في شارع الملك فيصل

,


بركنت يعني وقفت سيارتي فالباركن اي في موقف السيارات


.


ووقفت تكسي مثلي مثل اي حد من عامة الشعب

.

رحت المكان اللي ابيه خلصت شغلي ورديت للمكان اللي وقفت فيه سيارتي
.

وبكل براءة الكون..فتحت شنطتي..حتى اطلع المفتاح
.

وافاجأ بأن...المفتاح غير موجود

.

+_+_+_+_+_+_+_+_+_+

.

وبن المفتاح يا اقصوصه الحلوه؟

.

المفتاح اكييد طاح فالتاكسي وانا اطلع الفلوس
.

طبعا وقفت مثل الهبله عدال السيارة..ومب عارفه شو اسوي
.

وبعد ما اجريت اتصالاتي مع الاهل
.

طرشولي حد يفتح السيارة ..ويسويلي مفتاح يديد

.

طبعا هالكلام كله الظهر... ع الساعه ثنتين جيه

.


ووصل الفني اللي يبي يفتح السياره ويسوي مفتاح بديل

.


وطبعا اجريت اتصالاتي بس هالمره مع ربيعاتي

.


اللي من الشارجه والمناطق المجاوره لها :)

.


طبعا خلال ربع ساعة بدت شجرة الصداقه تؤتي ثمارها

.


ووصلت اول وحده من ربيعاتي..كانت توها طالعه من الدوام

.


وبما ان الفني بياخد وقت لين يخلص السياره

.


ربيعتي اقترحت ان احنا نروح نتغدى فأي مطعم قريب

.


بدل ما نتم واقفين فالشارع بدون فايده جيه

.


رحنا تغدينا ورجعنا..وطبعا صدمت بأن الفني ترك السيارة واختفى

.


ويوم اتصلت فيه قاله انه ببالغ الحزن والالم يبلغني انه ما قدر يشغل السيارة

.


لان كمبيوترها ما استجاب لان السيارة موديل يديد :(

.


تخيلوا الموقف يعني...منتهى الاحباط

.


طبعا كمحاوله اخرى كلمنا فني ثاني وقال انه بيحل الازمه اكيد

.


وبهالفتره طبعا بديت انا احس بالخطر واتمسك اكثر بسيارتي

.


واقول مستحيل ارد البيت بدونها لو شو يصير

.


طبعا الفني الثاني بعد طلب ساعتين حتى يخلص السياره

.


خلال هالمده وصلت ربيعتي الثانيه..

.

اللي اقترحت ان احنا نروح نقعد ع البحيره

.


ناكل او نشرب اي شي..لين يخلص الفني

.


طبعا اتفقنا معاه انه اول ما ينتهي يخبرنا

.

ورحنا قعدنا ع البحيره بانتظار الفرج

.


وتمر الساعات..والفني ما يتصل

.


ونرجع احنا الى مسرح الجريمه

.


لافاجأ انا بأن سيارتي الحبيبه

.


واقفه بروحها في الباركن الرملي

.


لا انيس ولا ونيس..طبعا انا انصدمت

.


وربيعاتي..وحده ع يميني..وحده ع يساري

.


قاعدين يواسوني على مصابي الجليل :(

.


مثل ما صار مع الفني الاول..قعد الفني الثاني يتأسف

.


لانه ما قدر يهزم كمبيوتر سيارتي العنيد

.


وطبعا انا بيني وبينك في داخله فخوره بهالكمبيوتر

.


اللي محد لين الحين قدر عليه :)

.


وكمحاوله ثالثه واخيره..ستدعين فني ثالث

.


هالمره قلناله انه احنا بنروح البيت...وهو لو الله وفقه

.


وقدر يح4قق مافشل غيره في تحقيقه

.


ساعتها خله يتصل فينا..ولو ان الامل معدوم :(

.


طبعا رحت ربنا البيت قلت لهم ان احسن لي ارقد

.


لاني ما اعتقد انه الفني بيقدر يحل الازمه

.


قالولي لا خل عندج امل..وعيني خير

.


طلعنا يبنا عشى بما ان ها يوما الاكل العالمي

.


وردينا البيت تعشينا..وتمينا نطالع تلفزيون

.


وبعد ما مر اكثر من ساعتين..طبعا لا حد اتصل فينا ولا حد عبرنا

.


وكالعاده..اتصلنا بالفني الثالث

.


االلي كمزملاءه اللي سبقوه

.


بلغنا بالغ اسفه واساه..واعتدر لانه ما قدر يحل الموضوع

.
ورجع السبب بهال
شي لسيارتي العنيده اللي ما تستجيب

.


طبعاا بهالاثناء اهلو كانوا مبلغين الشرطه عن المفتاح المفقود

.


وقالولنا انهم بيبلغونا لو صار اي جديد

.


طبعا ما نما بسرعه قعدنا نبربر طول الليل

.


وع الساعه 2 بدت قوانا تخور واستسلمنا كالملاءكه لنوم عميق

.

الصبح قمت ع لى خبر حلو..المفتاح لقوووه :)

.

واخيرا وبعد طول فراق بيني وبين سيارتي الحبيبه

.

خدت المفتاح ورحت الى موقع الحدث وشغلت السياره

.

بس النتيجه كانت مفاجأه لي

.

السياره ما اشتغلت تخيلوا؟

.

والسبب انه تم العبث من قبل اكثر من طرف بكمبيوترها المصون

.

طبعا لازم تنشل بالونش وتروح الصناعيه..وتتصلح هناك :(

.

يعني يا فرحه ما تمت..والمزيد من الانتظار

.

بالنهايه ع الساعه 4 العصر من مسا يوم الخميس

.

وبعد حوالي اكثر من 26 ساعه من االمعاناه

.

سلموني سيارتي اخيرا..بعد طول عداب :)

.

02‏/02‏/2009

تخاريف ليليه *الرجاء عدم الدخول*


تحديث: قرأت خبر في مدونة الاخ mohamed ghalia هل
تبحث عن السعاده عن وفاة الاخ محمد الفارس الملثم صاحب مدونتى
ثرثره مع نفسي

وثرثره تحت المطر
.
مادري بس رغم عدم معرفتي القويه بالمدونه وصاحبها احس نفسي
مب مستوعبه الخير يمكن لانه اخر تدوينه للمدون من كم يوم كاتب
فيها انه يمر بوعكه صحيه هالفتره وانه اول ما يخف بيتابع تعليقات
كل اللي ردوا عليه؟اتمنى لو حد عنده تفاصيل عن الموضوع يخبرني
لاني وايد مصدومه من الخير : ( الله يرحمه برحمته يا رب
.
.
,
.
مسا الخير


.


احس اني بحاجه ماسه اني اكلم اي حد


.


ومب لاقيه اي انسان مناسب اطلع اللي فخاطري له


.


من البدايه بقولكم اني ما احب كتاباتي تكون حزينه


.


لهالسبب ابتعد عن التدوين يوم تكون معنوياتي نازله


.


لان احس ان الناس عندها ما يكفيها من الهموم


.


غالبا افرغ كل اللي فقلبي عند وحده من ربيعاتي


.


الحين ما اقدر لاني مالي خلق اكلم حد


.


دايما ابدى بكتابة تدوينه وما اقدر انهيها..


.


ما اعرف ليش


.


اتمنى هالمره يحدث تغيير


.


واقدر انهي ما بدأت


.


لو حد فيكم وراه موعد او ارتباط


.


يفقد الامل من انه يروووح


.


لاني مطوووله اليوم :)


.


اكيد كل واحد فينا تختلف حالته من وقت للثاني


.


مرات هالاختلاف يكون بارادتنا وغالبا لا


.


التدوينه هاي ما بتفهمون الهدف منها


.


لاني ما في فبالي غير اني ابا اتكلم وبس


.


احس اني وايد مضغوطه


.


واسوأ من هالاحساس إحساسي بالوحده


.


هالشبح اللي يطلع بين الحين والاخر


.


ويبدأ في مطاردتي..وابدا معاه في صراعي المعتاد


.


وانتصر...بس بعد طول عراك


.


وبعد ما اكون للاسف على وشك استنفاذ كل طاقتي


.


ادري ان الحياه متعبه


.


وادري ان كل واحد فينا له نصيبه وحصته


.


وبالنهايه كلنا متساويين بكل شي


.


بما اني اعتبر اني اثرثر مع روحي


.


توقعوا انكم تقرون بهالتدوينه امور غريبه


.


منها اني احب الحلويات وااايد


.


واحب المأكولات البحريه اكثر من اللحوم


.


واحب الكتب وايد بس للاسف من زمان ما قريت


.


واحب التسوق وايد..ومن زمان ما تسوقت


.


وفي انسان تجمعني به قرابه..


.


اتمنى ولو بالحلم ان علاقتي تكون فيه طبيعيه


.


اممممممممممم وفي انسان عزيز وايد ع قلبي


.


اتمنى لو يكون عنده اراده قويه شوي


.


وفي ناس اتمنى اني ما اقسى عليهم ابد


.


واندم وايد يوم اعصب عليهم واقصر معاهم :(


.


وفي اشيا وايد حلوه نويت اسويها بس نسيت


.


وفي شخص توفى من فوق العشر سنين


.


اكن له حب كبير ومستحيل انساه


.


وهو يدي (جدي) من الاب


.


وفي ناس من فتحت عيني ع الدنيا وهم معاي


.


وفجأه فزحمة الحياة ابتعدوا عن محيطي


.


وخلفوا فراغ كبير..رغم السنين اللي مرت


.


محد قدر يسده :(


.


وهم اهل امي وبالاخص يدتي (جدتي) من الام


.


اللي استقروا فلبنان من حوالي 3 سنين


.


وفي صديقه لي من ايام الاعداديه


.


انتقلت للخارج مع اهلها


.


وفقدت اتصالي بها من سنين للاسف


.


بس عمري مانسيتها


.


وفي شخصيات وايد كانت مصدر الم في حياتي


.


ورغم هالشي اشعر احيان وايد تجاهها بالحنين


.


رغم فداحة الدكريات اللي تجمعني بها


.


مثل مرت ابوي:)


.


وفي مدرسه كانت تحبني وايد فالمرحله التأسيسيه


.


اسمها نبيله مرشد الفرس


.


(صدق اني فضيحه هههههه)


.


انا بعدني احبها لين الحين


.


رغم اني مما اعرف عنها شي


.


من حوالي اكثر من 15 سنه :)


.


وفي شخص اعرف انه يحبني وايد


.


رغم اني ما اعرف عنه شي :)


.


اعتقد ان هاي اطول تدوينه كتبتها بحياتي


.


ولو استرسات بخبركم قصة حيياتي


.


اتمنى محد يكتنشف اني معقده لووووول


.


قبل ما انهي بعترف لكم باعتراف بسيط


.


في ناس وايد مهمه بحياتي


.


وغيابها يأثر علي لانها مهمه عندي


.


بس للاسف اانا مش من النوع


.


اللي ممكن يعترف بأثر غياب اي حد


.


لهالسبب اعتدر وايد لكل صديقاتي


.


ولكل الناس اللي أنا غاليه عندهم


.


و حسستهم بطريقه او اخرى انهم عاديين بحياتي


.


ابا اقولهم اني احبكم...بس اعتدر..انا جيه"(


.


اشوفكم على خير :)