22‏/11‏/2008

اخر الليل

مساء الخير
شحالكم عساكم بخير
طبعا هالتدوينه تأخرت شوي لحد ما نزلتها
لأني ما كنت اعرف كيف انزل مقطع الفيديو
بس اخيرا والحمدلله بس ما تلقيت مساعده خارجيه!
ضبط معاي الموضوع واشتغل الفيديو
ان شالله عاد بعد هالتعب الانشوده تعجبكم
اترككم معاها




(اخر شخبطه)
طريق طويل
طويل وخطوه بخطوه
انا امشيه
وعمر بالغصب والطيب
انا اعيشه
ودرب ممتلي بأشواك
اهرول فيه
وتجرحني
وتدميني
دبابيسه..!

للي سأل عن امتحاني للاسف رحت المعهد وبعد ساعه كامله من الانتظار قالولنا ما في امتحان لان سيرفر الموقع الخاص بالاي سي دي ال ما اعرف شو فيه !! طبعا انواع الاحباط خاصه ان ما باقيلي الا هالمادتين ابا اخلصهم وافتك قبل العيد بس شسوي قدر الله وماشاء فعل! المهم الوقت تأخر وانا عندي معهد باجر يعني حان وقت النوم يا اصدقاء لووووووووول:)

14‏/11‏/2008

يوميات


مساء الخير



شخباركم عساكم طيبين؟



اليوم بستعرض معاكم كل شي سويته هالاسبوع



ببدى من يوم السبت



طبعا هاليوم كان يوم سيئ نوعا ما
للاسف .قمت ع صوت المنبه كان المفروض
اتجهز واروح المعهد أخذ الحصه الاولى من
مادة الباور بوينت،بس لان مزاجي كان
بغاية السوء كنسلت الفكره لاني كنت
متأكده ان هالمشوار ما منه فايده لان
مزاجي التالف ما بيخليني اقدر استوعب
اي شي!بالتالي طفيت المنبه ورجعت نمت!
وفالليل رحت مع امي لموعدها مع دكتور
التغذيه والحمدلله كان المشوار موفق:)
واحنا رادين البيت كان خاطري فايس
كريم من باسكن روبنز بس طبعا ما
سوولي سالفه وما إشترولي شي
وسوولي طاف!



يوم الأحد



قمت الصبح من وقت طبعا تجهزت
وتلبست وفورا للمعهد خذت الدرس,
وكنت (مبلمه) وايد ما اعرف ليش!
حتى المس مستغربه مني تقولي شو
فيج استيعابج قل فجأه جيه!
قلتلها اني متضايقه شوي:( ..
المهم خلصت الحصه ورجعت البيت
وكان يوم عادي وايد ما صار فيه
اي شي يذكر غير انه معنوياتي
كانت داااااون وكان مالي مزاج
لاي شي! الشي الوحيد اللي اذكره
اني هاليوم نمت الساعه 8 ونص
فالليل وتميت راقده لين 7 الصبح
ثاني يوم!اللي هو صباح الاثنين



يوم الاثنين



قمت طبعا وانا نشيطه وشبعاااانه نوم
تريقت وقعدت ع النت شوي انتظر
وقت المعهد وع الساعه 9ونص تليفوني
رن بشكل متكرر كانت المكالمه من
المعهد يبلغوني فيها ان الحصه
اليوم تكنسلت لان المس غايبه!
طبعا انا واعيه من الصبح بانتظار
وقت الدوام وكل ها طلع ع الفاضي
اخر شي،وطبعا كنت فقمة نشاطي
وما عندي اي إستعداد اني اقعد فالبيت
فقعدت افكر ويييين اروح عقب
تذكرت اني ما رحت بيت عمي
من زمان قلت يلا وفورا ركبت السياره
والى هناك..يلست نص ساعه
عقب رجعت البيت،وخششش بعد نمت
وقمت 4العصر و تلقيت عزومه
على حفلة عيد ميلاد اخر الاسبوع,
فقلت يلا خلني اسير السوق اشتري
هديه للعيد ميلاد،وطبعا الهديه
اللي فبالي ما لقيتها بسهوله..
درت بأكثر من مكان لين حصلت
على مبتغاي..تعشيت وشريت ايس كريم
من باسكن روبنز اخيرا :)
وبعدين رجعت البيت وخششش نمت





يوم الثلاثاء



كالعاده صباحا المعهد..
المس عاد هاليوم انفجرت فيني
لانها حست اني امر بفترة بلاهه
ذهنيه فظيعه..قالتلي انها هالاسبوع ما
بتسمح لي امتحن لانها ما تتحمل صدمة
رسوبي!وقالتلي ان الافضل لي اني اوقف
هالاسبوع وما امتحن اهون من اني
ارسب! طبعا انا صدمت للفكره وحسيت
اني صدق مصختها وان الموضوع شكله يمكن
يقلب جد فقلت يا بنت بسج استهبال
وركزي شوي،فقلتلها عطيني فرصه اتمرن
هاليومين واراجع فالبيت وان شالله
بيتحسن مستواي وبرد مثل قبل،وأول ما
طلعت من المعهد مريت ع امي وسرنا
العياده عشان ناخذ نتايج تحاليلها الدم
والحمدلله طلعت كلها زينه بس طلع عندها
ارتفاع بالكليسترول وعقب ما شفنا
الدكتوره رجعنا البيت،خذت انا لابتوبي
ورحت للمعهد مره ثانيه عشان يسوونلي
عليه شوية تعديلات واقدر اتدرب عليه
،وبعد ماعدلوه ورجعت البيت قعدت
اتدرب لين حسيت اني راضيه
ع مستواي وبعدين نمت قريرة العين:)



يوم الأربعاء



اللي هو اول امس :)
كالعاده المعهد صباحا
،بعد المعهد رديت البيت،
والعصر العياده مع امي موعد اسنان
هالمره,حوالي ساعتين فالعياده
بعدين عوده الى البيت،شوية تدريبات وتجهيزات
لإمتحان الغد.وسهره حلوه مع شخصيه من
الشخصيات المحببه الى قلبي ع المسنجر وموضوع
النقاس حوار الديانات لووووول
بعدين ع الساعه 2 فالليل نمت
ولين الساعه 12 الى ربع من صباح الخميس





يوم الخميس



طبعا قمت من النوم ع اتصال
صديقه لي استغربت ان بعدني
نايمه لهالوقت! طبعا امتحاني الساعه 1 الظهر
عشان جيه خذت راحتي بالنوم بهاليوم.
طبعا تجهزت وطلعت ع الساعه 12 ونص
من البيت،انا والسياره يوعانين،
وطبعا لان أفالونتي العزيزه غاليه على قلبي
قررت ابديها عن نفسي واروح قبل ما اتريق
اعبيها بترول،بعد ما اتخمت السياره بالبترول
رحت طلبت براتا بالبيض والجبن من الكفتيريا
مع كوب شاي احمر طبعا هاي سياسة تدليل الذات
اتبعها مع نفسي ايام الامتحانات
عشان اييب درجه حلوه:)
وهالمره ولله الحمد هالسياسه نفعت
ويبت فالامتحان 92:) بعد ما خصلت الامتحان
رجعت البيت طبعا المعنويه مرتفعه
والابتسامه شاقه الحلج ووداعا للاكتئاب:)
قعدت مع امي شويه والا اسمعها تقولي
انه خاطرها تتحنى،وبما ان احنا معزومين
اليوم على عيد ميلاد قلتلها يلا الصالون ترى
ما ورانا شي فاضين لوووووووول
طبعا اعتبرت الحنه مظهر من مظاهر الاحتفال
بنجاحي بالامتحان :)
طلعنا من البيت ع الساعه 3 وربع الظهر
تحنينا و5 ونص كنا راجعين البيت
،سبع ونص سرنا العزيمه تمينا هناك
لين الساعه 11 وبعدين ردينا البيت
قعدت شوي ع النت وبعدها خششش نمت



الجمعه اللي هو اليوم



قمت من النوم الساعه 10 الصبح
فورا قعدت ع النت وبعدين تسبحت
وشربت دلة شاي كامله وقعدت افكر
بموضوع التدوينه اليديده اللي بنزلها:)
تذكرت ان باجر عندنا ضيوف
وبيكون يوم حافل بالأحداث بالتالي
ما بيكون عندي وقت اهتم بمدونتي العزيزه
فقلت لازم استغل الوقت اليوم لان باجر
ما في امل جدولي فل :) وكتبتلكم هالموضوع
اللي لو قريتوه من اوله لين اخره
يعني صدق انتوا ناس صبورين لوول


(بعد ما كتبت التدوينه وانا اراجع الاخطاء اللغويه وصلني خبر وفاة ابو مرت عمي،طبعا ما قدرت اكمل التدقيق اللغوي وانزل التدوينه ورحت فورا بيت عمي ،من 5 العصر لين 10 فالليل وتوني و اصله البيت من ساعه هاليوم كان شاق وباجر بعد وراي عزا ادعوا للمرحوم بالرحمه!)

08‏/11‏/2008

تاج






مساء الخير..كنت اعتقد إن التاج للملوك والعرايس فقط :)


بس اكتشفت إن في تاج بعد للمدونين

وبما اني من كم يوم تلقيت تاج من الاخ mohamed ghalia


فقلت لازم اجاوب ع الاسئله اللي فيه مثل ما وعدته


وهذا بيكون موضوع التدوينه اليوم :)





السؤال الأول:ماهى السعادة من وجهة نظرك؟


السعاده..السعاده هي راحة البال..انك تكون مرتاح نفسيا..تكون مش ظالم حد..ومش مظلوم بعد :) ان احتياجاتك الاساسيه في الحياه تكون موجوده..وما تحتاج لاي انسان..وان ربك يكون راضي عنك وتكون انت راضي عن نفسك بعد






السؤال الثانى: كيف تصل إلى السعادة؟


اصل للسعاده يوم اسوي كل واجباتي وألتزم بالخط اللي رسمته لنفسي واكون راضيه عن نفسي وعن علاقتي بربي وعلاقتي باسرتي وعلاقتي بالناس:)




السؤال الثالث: هل السعادة وهم أم أنها حلم صعب؟


مش وهم اكيد..يمكن حلم صعب!




السؤال الرابع: هل السعادة طريق للنجاح ؟وضح؟


طبعا السعاده طريق للنجاح,يوم تكون سعيد طاقة السعاده هاي تدفعك لانك تسوي اشيا وايد ما تقدر تسويها بحالاتك الطبيعيه,السعاده تمدنا بالطاقه اكيد وتخلينا نسوي اشيا فوق المعقول قياسا لطاقاتنا العاديه:)




السؤال الخامس: ماهى أكثر اللحظات التى شعرت فيها بالسعادة؟


بصراحه!..مابا اكون كئيبه!...بس جديا ما اذكر!





السؤال السادس:هل ممكن أن تحقق كل شىء؟


مستحيل..! ما في انسان فهالدنيا ممكن يحقق كل شي لان ببساطه..الله ما خلق الدنيا عشان الانسان يرتاح فيها..لازم يكون شي ناقصه..كنت اتحاور مع نفسي من شوي بهالخصوص!كنت متضايقه من جوانب النقص اللي فحياتي بعدين سالت نفسي..يعني انا ابا اخذ كل شي؟حسست نفسي اني طماعه..وذكرت نفسي اني عايشه فالدينا مش فالجنه!! لو قدرنا ناخذ كل شي فالدنيا..عيل شوبيكون الفرق بينها وبين الجنه؟ بتكون الدنيا ساعتها جنه..وها شي طبعا مستحيل :)




السؤال السابع: السعادة تجعلك تقبل على الحياة أم لا؟

اكيد طبعا السعاده تخليني اقبل ع الحياه وتعطيني حافز اكبر على مقاومة صعوباتها وعلى الاستمرار:)




السؤال الثامن: هل أحسست يوما انك وصلت لقمة السعادة؟


هالشي اتذكره لاني حسيت فيه من مده قريبه..يوم شعرت اني قدرت اسعد امي وادخل ع قلبها السرور,وها شي يعنيلي الكثير..واعتبره قمة سعادتي,واحمد الله واشكره انه قدرني وقدرت اسويه




السؤال التاسع: لماذا تمر أوقات السعادة بسرعة؟

ما ادري فعلا..والدليلل اني ما قدرت اذكر اي لحظة سعاده مر عليها مده!يمكن دايما الشر اقوى من الخير,وبالتالي الحزن بعد اقوى من الفرح,والدليل ان احنا ما ننسى لحظات الالم ابد وتتنحفر بذاكرتنا حفر الى امد بعيد




السؤال العاشر: هل ترى السعادة فى التدين؟


اكيد :)




السؤال الحادى عشر: هل أنت متفاؤل وعندك أمل؟وضح؟


الحمدلله..لانسان بدون تفائل ..مايقدر يكمل دربه بالحياه..وبدون امل..ما يقدر يعيش..الامل بالله دايما يسهل كل الامور..يعني لو ما تسلحنا بالامل بنستسلم امام اول عقبه تواجهنا فطريقنا,وبالتالي بنبقى محلك سر,الامل دوما سر النجاح





السؤال الثانى عشر: إذا شعرت بالحزن ماذا تفعل؟


غالبا اتناقش مع نفسي..واقعد ادور ع سبب الحزن,اذكر نفسي بالنعم اللي عندي..لين يتحسن الحال واحيانا لو كانت الحاله مستعصيه..ممكن اصيح!(يعني اعيط او ابكي)..وغالبا بهالحالات افضل انام..لاني اكون عصبيه وايد يوم اكون حزينه..فالافضل اريح اللي حوالي مني وارتاح..ومافي احسن من النوم كحل مثالي اكيد :)






السؤال الثالث عشر: هل يستمر معك الحزن فترة ام ينقضى فى الحال؟


حسب سبب الحزن..مرات يطول ومرات لا..بإعتقادي غالبا كل انسان يقدر يتحكم الى حد ما بمدة حزنه..يعني لو شغل نفسه وما حاول يفكر بالموضوع اللي يضايقه..اكيد بنسى بسرعه..ومشاغل الحياه خير كفيل بهالشي :)




السؤال الرابع عشر: ما رأيك فى الأفراد المتشائمين؟


اكيد الله يعينهم..لانهم يضرون انفسهم بالدرجه الاولى,وياثرون عللى اللي حواليهم تأثير سلبي اكيد..انصحهم طبعا يتفائلون..لان الحياه اكيد حلوه..بس هم لازم يغيرون نظاراتهم عشان يقدرون يشوفون الجمال اللي فيها..وما ينسون ان عندهم رب كريم..رؤووف رحيم:)



اتمنى اكون جاوبت.وكفيت ووفيت مثل ما يقولون:)..وشكرا لصاحب التاج.