27‏/11‏/2009

وعاد العيد : )


صباح الخير
.
.
تدوينه فصيحه بمناسبة العيد
.
.
منذ دقائق رجعت الى المنزل
.
.
في زحمة التحضيرات الى العيد
.
.
لم اجد وقتا لمدونتي الحبيبه
.
.
لكن قبل ان ينتهي يومي
.
.
احببت ان ابارك لشركائي
.
.
في عالم التدوين
.
.
حلول عيد الاضحى المبارك
.
.
اعاده الله علينا
.
.
وعلى الامه الاسلاميه
.
.
باليمن والبركات
.
.
عيداَ سعيداَ
.
.
وبإذن الله كل عيد احلى من سابقه
.
.
كل عام وانتم بخير :)

21‏/11‏/2009

ماماتي حياتي




صباااح الخير

ما في احلى من التدوينات الصباحيه

تدوينات مليئه بالحيويه والنشاط

اليوم يوم سعيد

لان اليوم امي بترجع من السفر بعد طول غياب

طبعا بهالمناسبه ابا اعبر عن سعادتي بهالحدث الجميل

وامس بعد مريت بإحساس حلو

قلت لازم ادونه

امس ركبت الارجوحه

من زمااااااااااااان ما ركبتها

ما اعرف ليش حسيت وانا اتأرجح اني رجعت طفله

فعلا احساس غريب

تحس انك تطير فوووووووق

ههههههههههههههههه

ادري بتقولون العقل زينه

بس حبيت اعبر عن احاسيسي

طبعا التدوينه هاي بديت بكتابتها صباحا

وما قدرت اكملها لاني انشغلت

والحين بكملها في مساء نفس اليوم

لو لكم احباب غايبين

عسى الله يردهم لكم سالمين
يا رب

واللي عندهم اهل يدرسون بره

ان شا الله تعيدون مع اهاليكم :)

ما بطول عليكم

في تاج بتشوفون اجاباته عما قريب

وطبعا عنا عدة مناسبات قادمه

يعني المدونه شغاله على قدم وساق هاليومين

يلا سي يو سوووون
(الحروف الملونه اسم ماماتي )

18‏/11‏/2009

/*\ في حب الكلمه المقروءة /*\

مساء الخير
.
تعرفون انا كل ما ابدى بكتابة تدوينه
.
احاول اغير المقدمه اكتب شي ثاني عوض مساء الخير
.
بس مع الاسف دوم افشل بهالشي
.
يا ترى بشو ممكن استبدل كلمة مساء الخير؟
.
ما اعرف بس احس ان هالكلمه هي اكثر شي مناسب :)
.
ما علينا
.
اليوم الله يسلمكم رحت مكاني المفضل
.
جنتي على الارض
.
طبعا اكيد خمنتوا وين
.
هيه صح مثل ما توقعتوا
.
معرض الكتااااااااااااااااااااااااااااااب
.
شعار معرض الكتاب هالسنه
.
في حب الكلمه المقروءة
.
بصراحه الشعار حلو واللي ابدع الشعار صدق فنان :)
.
انا احب الكلمه المقروءة جدا جدا
.
المهم الله يسلمكم اليوم رحت معرض الكتاب وما ادراك ما معرض الكتاب
.
بصراحه اكثر شي لفت نظري فالبدايه
.
وجود كم هائل من الشباب
.
انا استانست طبعا قلت الحمدلله شبابنا مثقف ومحب للقراءه :)
.
ومن الوناسه قلت لربيعتي شفتي الجيل الجديد هم اللي بيرفعون راس الامه
.
طبعا ربيعتي نظرت لي نظرة اشفاق وقالتلي
.
ما لاحظتي شي؟
.
قلتلها لا شوووو؟
.
قالتلي ولا واحد منهم في بإيده كتاب يا ترى ليش؟
.
وافاجأ بأن.....فعلا كلامها صحيح *ـــ*
.
كلهم ماسكين بيدهم شي يؤكل او يشرب!
.
وهم طالعين من المعرض يعني خلاص الجوله انتهت :(
.
معقووووله؟
.
طبعا انا قلت يا بنت لا إن بعض الظن اثم
.
ودخلنا المعرض
.
واول ما دخلت رحت الريسبشن اسال عن كتب اريدها
.
وعطيت الموظفه اسماء الكتب اللي ادورها॥وانتهزت فترة انشغالها بالبحث وسالتها
.
ما شالله في اولاد وايد فالمعرض , بس ليش ما يشترون؟
.
قالتلي لانهم مش زايرين المعرض عشان يشترون
.
قلتلها عيل ليش زايرين المعرض عيل؟
.
قالتلي : لـمآرب اخرى!!
.
انا طبعا فتحت حلجي ببلاهه وقلتلها هااا؟
.
وربيعتي سحبتني من ايدي وقالتلي
.
اقول يلا ندخل بس انتي وهالعالم للوردي اللي عايشه فيه !
.
وانا طبعا لا تعليـــــــــــــــــــق
.
المهم اني دخلت معرض الكتاب
.
وخذت جوله قصيره نسبيا قياسا بجولاتي السابقه في معرض الكتاب
.
اللي غالبا ما تاخذ حوالي ساعتين
.
بس هالمره اكتفيت بساعه واحده فقط نظرا لضيق الوقت :)
.
بنهاية جولتي هذه طلعت خمسة كتب
.
بستعرضها معاكم الحين
.
اول كتاب
.
الزواج من بوذا
.
للكاتبه الصينيه وي هيوي
.
الكتاب لدار الجمل ومن ترجمة خالد الجبيلي
.
هالكاتبه طبعا لها عمل روائي اخر سبق لي قرائته
.
وهو روايه بعنوان شنجهاي بيبي
.
الروايه اثارت جدلا كبيرا في موطنها الام وتم احراقها ومنعها
.
لانها جريئه وخارجه عن النص نوعا ما
.

الكتاب الثاني

الف منزل للحلم والرعب

لدار الجمل ايضا

تأليف عتيق رحيمي (كاتب افغاني)

وترجمة اسكندر حبش

طبعا اول مره اقرى لهالكاتب :)



ثالث كتاب بعنوان


قوة التحكم في الذات

للدكتور ابراهيم الفقي (حاصل على دكتواه في علم الميتافيزيقا)

هذا اول كتاب اقراه لهالكاتب

وان عيبني ان شا الله بشتري باقي المجموعه :)



رابع كتاب هو


كويتي من كوكب اخر

للكاتب خالد عادل النصر الله

هالكتااب قريت عنه اثناء تجوالي بين المدونات الكويتيه

ولقت نظري لهالسبب شريته عشان اقراه :)


.
وخامس كتاب طبعا ما لقيتله صوره
.
وهو كتاب بعنوان 120 صنف سمك
.
على فكره هاي اول مره اشتري كتاب طبخ من معرض الكتاب :)
.
يمكن لاني من عشاق السمك لهالسبب لفت نظري هالكتاب
.
طبعا هدف زيارتي الاساسي للمعرض اني اشتري كتابين كنت ابحث عنهم
.
وللاسف لم اوفق بالحصول على هالكتابين
.
بس المهم اني طلعت بحصيله جيده من الكتب
.
شكرا لمشاركتكم لحظاتي السعيده
.
وكل معرض كتاب وانتوا بخير :)

03‏/11‏/2009

فرح + تغيير + تفائل = شي حلو

مسااااااء الخير


شحالكم شخباركم شعلومكم شو مسوين؟


بما اني اليوم مستانسه


طبعا لا تسألوني ليش لان انا مابخبركم


المهم اني بهالمناسبه يعني بكتب تدوينه


بس من الاول بقولكم لا تتوقعون تقرون بهالتدوينه
.
اي شي مفيد :)


فرح


اليوم انا مستانسه وايد


لان اليوم صار شي اسعدني


طبعا انتوا بيقتلكم الفضول عشان تعرفون


بس للاسف انا ما بقول لاني شريره نياااااه


طبعا اكيد انتوا ما تعودتوا اني اكون شريره وياكم


بس اليوم بتشوفون هالطبع اليديد :)


طبعا هاليومين انا صايره مدمنه سوق


كل يوم والثاني رايحه و راده


تعرفون ان التسوق شي جدا جميل؟



تغيير


بالحديث عن التسوق اكيد


بنتقل للحديث عن التغيير


التسوق احد الوسائل اللي ممكن نحس فيها بالتغيير


يعني يوم نلبس شي يديد


او نشنري لوحه يديده مثلا


اوكتاب


او اي شي


شعور جميل :)


يشابه فرحة الطفوله


لما كنا نستانس على اي لعبه جديده نشتريها


او نفرح باي هديه او لبس يديد


انصحكم بين الوقت والاخر بالتسوق


بس ها لا تتعودون عليه


لان اي شي بالعاده يفقد طعمه


والروتين فعلا يسلب بريق اي شي !


تفائل


اليوم كنت سايره البنك


ووصلت البنك قبل موعد اغلاقه ب 8 دقايق


وافاجأ بان.......... الباب مسكر من الحين


طيب كيف ترى باقي ع الدوام 8 دقايق


وانا المعامله اللي بسويها مابتاخذ دقيقتين!


بيني وبينكم تضايقت


خاصه اني ضاربه خط يعني اكثر من 20 دقيقه طريق


هاي مشكلتنا فالعالم العربي


ما في احترام للوقت


ولا في تقدير لقيمته!


طبعا ما اكتمل الموقف على هالشي


لا


اول ما حاولت اطلع من البنك
.
لاحظت ان المنطقه صارت مزدحمه جدا بالسيارات


لدرجة اني ما قدرت اطلع من الباركن اللي انا فيه


استغربت شو السالفه


تذكرت ان في مدرسه قريبه من هالبنك


وان هالوقت وقت انتهاء الدوام و


وعينكم ما تشوف الا النووووووووووووووووور


نص ساعه يا خلق وانا واقفه فالباركن
.
احاول بس اتحرك قيد انمله من مكاني


ما في فايده


يمين يسار شرق غرب


طريقك مسدود يا ولدي


مسدود مسدوووووووود


طبعا اكثر من عشرين دقيقه وانا على هالحال


وقعدت اقول بقلبي ليتني ما طلعت ليتني نايمه فالبيت!


اخر شي شكلي كسرت خاطر حد من اللي وراي


وعطاني مجال وطلعت من الباركن


بعد ما كنت خلاص قررت
.
اني اخذ قيلوله فالسياره لين تنحل الازمه!


بس الحمدلله قبل ما اباشرفي تنفيذ قراري انحل الموضوع


طبعا اكيد لو كنتوا وصلتوا لهالجمله بتسألوني


وين الشي اللي يبعث على التفاءل في كل هالموضوع؟


بقولكم مافي شي!


الا ان احدى صديقاتي الصدوقات


مستانسه وفرحانه وايد اليوم


وكل شوي تتصل فيني تقولي انا سعيده انا سعيده


لين خذت منها عدوى السعاده اليوم


ولقيت الوجبه كبيره عليه بروحي


فحبيت اشارككم فيها


نعم للتفائل..لا للتشائم

.
يلا اطلعوا من تدوينتي وانتوا محملين باكياس السعاده
.

اراكم على خير
.
.
ملحوظه: هالتدوينه كتبتها يوم الثلاث الماضي الموافق 3/11
.
.
وما قدرت انزلها بنفس اليوم لحدوث مشاكل فنيه فجهازي الحبيب:(
.