31‏/10‏/2008

هذيان من ارشيفي





مساء الخير..اليوم حبيت اشارككم بخاطره قديمه نوعا
ما..كتبتها من فوق الـ3 سنوات تقريبا

هي كئيبه نوعا ما..وغريبه اكثر..كتبتها بفتره كنت

اعاني منهامن مشاعر متضاربه..خاطره غامضه :)


الـخاطره بعنوان


هذيان




كما تمضي بنا الايام

يمضي ها هنا عمري


فأكبر تصغر الاحلام



ويبقى ها هنا جرحي


وامنية بها اغفو


وابحر في سماء الغد


فوق مراكب الذكرى


وبين المد و الجزر


ثابتةً هي الشكوى


ويبقى طيف امالي


يداعب نشوة الفكره


ترى هل ادخل التاريخ


ام ابقى بلا عبره؟


وماذا يعني لي التاريخ


سوى اوراق تقويمي

سوى ارقام


كم تجري


بلا جدوى


اتبحث عن خيال ضاع


ام تستأنس العدوَ؟

26‏/10‏/2008

أحاسيسي






بما ان اليوم يوم خاص في تاريخ مدونتي,حبيت اكتب لكم اليوم اي شي يدور فبالي,مثلا ابرز الطباع اللي اشوفها فيني,كل انسان فينا له طريقة تفكير معينه,ويتأثر بأشخاص محددين اكثر من غيرهم,أحاسيسنا بشكل عام تختلف وايد باختلاف ساعات النهار احيانا,في ايام نلقى فيها مشاعرنا تطغى عليها السلبيه,واحيانا العكس.
كل واحد فينا له مشاكله الخاصه فيه..همومه..متاعبه..مسؤولياته الخاصه فيه.
اليوم بحاول احدد اكثر النقاط اللي تشغل تفكيري بشكل عام..والامور اللي تمس مشاعري بشكل مباشر,فالبدايه انا انسانه عصبيه نوعا ما,حساسه,سريعة التوتر والانفعال,طموحه وايد,عندي احساس فظيع بالمسؤوليه ماأعرف ليش
احن للماضي بشكل كبير,احسه مرضي احيانا,جديه نوعا ما.اكثر طبع اكرهه بحياتي الاستهزاء!طبعا ها كله نقطه ببحر ولو اتم اتكلم عني ما بخلص اكيد-اليوم ع الاقل-وماخفي كان اعظم طبعا,اكيد بتعرفوني اكثر مع الايام.
اقدس الصداقه وايد,واحب احتفظ بصداقاتي على المدى الطويل,حتى بنات المدرسه على علاقه بوايد منهم لين الحين,بما ان ما عندي خوات,احب اكون وايد صداقات,ودايما صداقاتي تاخذ مساحه كبيره من حياتي,قرأت مره فموضوع ان الطفل الوحيد يكون وايد اجتماعي ويحب يجمع حواليه عدد كبير من الاصدقاء لانه يخاف وايد من شبح الوحده بيني وبينكم استانست(فرحت) يوم قريت هالموضوع لاني عرفت ساعتها ان المشاعر اللي احس فيها وايد طبيعيه وان كل الناس اللي ما عندهم اخوان مثلي يحسون بهالاحساس:لاني كنت مقتنعه بفتره سابقه اني وايد مكبره هالموضوع واني سويت لنفسي عقده بدون ما احس! بعدين يوم عرفت ان طبيعي اني افكر بهالطريقه تنفست الصعداء وقلت الحمدلله طلعت سليمه انا يعني,لاعقد ولا ما يحزنون:)
الحياه ما تعطي الواحد فينا كل شي,واكيد الله-سبحانه وتعالى- يختار لنا احسن الاشياء اللي تناسبنا,يقولون لو علمتم الغيب لأخترتم الواقع,بالتالي الواحد يحمد ربه ع كل شي.ما بطول عليكم,ولي عوده قريبه باذن الله.
ملحوظه:بعد ما انتهيت من كتابة الموضوع,وقبل ما انزله تحديدا,سويت باك بالغلط!.وتخيلوا عاد انمسح كل اللي كتبته:( صراحه تحطمت..وقلت مستحيل لو شو ما صار ارد اكتب الموضوع مره ثانيه..بعدين رحت للمسودات والحمدلله لقيت الموضوع موجود..
اي لف بلوجر خخخخخخخخخخ :)

25‏/10‏/2008

انا عندي مشكله:(

مسا الخير..اول شي بكلمكم عنه اليوم..هي مشكله باااطه جبدي(مطلعه عيني للاخوه المصريين)طبعا يوم بتعرفون شو هي..بتكتشفون انها تافهه,هي تافهه بالنسبالكم اكيد..بس بالنسبالي انا لا..مهمه وايد اكيد.مشكلتي الله يسلمكم اني من سويت هالمدونه لين هاليوم,ما اقدر ادرج اي صوره بأي موضوع!!طبعا لا تتحرون السبب اني ما اعرف كيف للاسف..انا اعرف..بس المشكله اني كل ما حاولت اطبق هالشي..ما يصير.كل ما اضغط على الايقونه اللي المفروض احط رابط الصوره فيها الايقونه اصلا ما تنفتح!!ما اعرف ليش !! قلت يمكن العيب بجهازي..جربت ودخلت من جهاز ثاني..نفس الخطوات ونفس النتيجه للاسف:(..وبالتالي نفس الاحباط,مادري بصراحه شو الحل..تعبت من هالموضوع,يا ليت لو حد فيكم يقدر يساعدني..ما يبخل علي بيد العون:)

تحديث:اسفه ع الخطأ الغير مقصود..كل مره ع هالحال..التعليقات تكون مغلقه بشكل اوتوماتيكي وانا ما انتبه..معلش..مدونه يديده نسبيا..اعذروني@@

16‏/10‏/2008

الفقر

مساء الخير
فالبدايه هالموضوع كان لازم ينزل امس..يعني نزل متاخر يوم
فاعذرونا ع هالتاخير..الغير مقصود
بلغني ان امس اللي يصادف 15 عشره
هو اليوم العالمي للتدوين
وان موضوع هاليوم هو الفقر
وبما اني جديده في عالم التدوين..علمت بهالمناسبه متاخره
تعرفون..في اشيا يوم نفكر نكتب عنها نعجز احيانا
لاننا نعرف انها اكبر من ان احنا نقدر نحتويها او نوصفها بكلمات
والفقر من هالاشيا
صعب وايد ان احنا نتكلم عن الفقر او نصف احساس الفقر والحاجه
الله عطانا نعم كثيره..وهالنعم لازم تخلينا نفكر بغيرنا
انا بالنسبالي احس ان الاهم نبدا بانفسنا
يعني اول شي نبدى نسال انفسنا عن ماهية مفهوم الفقر عنا
ونظرتنا للانسان الفقير شو هي
الاحظ ان بمجتمعاتنا نظرتنا للفقر او للانسان الفقير وايد سلبيه
يعني ننسى ان هالانسان بشر مثلنا..من لحم ودم واحساس
مرات نجرحه بدون ما نحس..سواء عن قصد او بدون قصد
بكلمه او نظره او تصرف..وغالبيتنا يسوي جيه
المفروض اول شي نسويه الحين..انا احنا نراجع انفسنا
ونصح مفاهيمنا..ونعيد رسم صورة الانسان الفقير عنا
بهالطريقه طريقه تفكيرنا بتتغير..وبنقدر نحس اكثر بالمشاكل اللي يواجهونها هالناس
اللي هم جزء ما يتجزا منا..ولهم حق علينا..لازم نحاول نتذكره دوم..ومانقصر فيه
اعذروني ع التدوينه البسيطه..كتبتها وانا مستعيله..واخر الليل..
باجر وراي امتحان..ادعولي..واشوفكم عن قريب

11‏/10‏/2008

وابتدى الجد (*_*)

مساء الخير

اليوم بديت يومي الصبح >>بالعاده اقوم الظهر او العصر من النوم

بس بشكل عام هالايام نظام نومي تغير..للاحسن طبعا مش العكس

الفتره اللي فاتت كان عندي مشاغل كثيره لازم تخلص الصبح

وبالتالي غيرت وقت نومي عشان اقدر اخلص كل اللي علي

طبعا الناس اللي متعوده تنام متاخر مثلي..تعرف ان الاستيقاظ المبكر نعمه

لان الواحد يوم يقوم متاخر من النوم يحس ان اليوم راح

اليوم كان اول يوم لي فدورة الكمبيوتر..او الليسن الدولي للحاسب الالي

طبعا كنت كل خمس ثواني اتثاوب :))

وكنت احاول قدر الامكان ان ما اخلي حد ينتبه لي

عشان ما ياخذون عني فكره اني كسوله من اول يوم

قريت مره دراسه تفيد ان المتثائب الجيد يعدي 7 اشخاص من اللي حواليه ع الاقل

ويخليهم يتثاوبون معاه:)

ومن يوم قريت هالمعلومه وانا احرص دوم اني عقب ما اتثاوب اطالع اللي حوالي

اشوفهم تثاوبوا والا لا..عشان اعرف هل انا متثاوب جيد والا لا

اليوم عاد حصل العكس..كنت اتمنى محد يتثاوب بعدي عشان مااكون عديته بتثاوبي

مع ان اليوم اجازه رسميه عندنا..بس المعهد اللي انا اخترته للاسف مخالف ما ادري ليش

طبعا يوم تلقى نفسك واعي من الصبح فيوم اجازه ومشغل سيارتك ورايح تدرس

بينما الشوارع فاضيه ما فيها غير المهنده ومرتادي البنوك..تحس بالغيظ

بس يلا من طلب العلا سهر الليالي..وقام الصبح من وقت :)

طبعا الدوره سبع مواد وكل ماده تاخذ 5 ايام دراسه ويوم امتحان..يعني المفروض اخلص ان شاء الله بـ7ــ اسابيع

وكل امتحان من 100 والنجاح من 75 ومدة الامتحان 45 قيقه..وتعالو سجلوا يلا عطيتكم كل المعلومات:)