25‏/08‏/2008

تلبك..فكري!!

مسا الخير
بداخلي اليوم انفعالات كثيره
ما اعرف بقدر اطلعها بشكل مرتب ومفهوم والا لا
اليوم مريت بمواقف وايد
وكل موقف كان له تاثيره الخاص علي
وللاسف تاثير سلبي بشكل عام
حسيت اليوم بضيقه كبيره
وكنت اسال نفسي وانا حاسه اني بختنق وقلبي منقبض من الضيق
يا ترى ليش الدنيا جيه
مرات اتسائل..الدنيا سيئه..والا احنا بتصرفاتنا اللي نخليها بهالسوء
ظروفنا يا ترى احنا اللي نكونها..والا تنفرض علينا؟
اكيد في جزء منها يكون مما جنت ايدينا
وفي جزء ثاني يكون مفروض..حكم القدر يعني
بس يا ترى لاي مدى ممكن احنا نتحكم بالجزء المفروض؟
ما في حد مثلا يقدر يتحكم بيوم وفاته..او بالمكان اللي بيموت فيه
او بانه يختار اخر تصرف بيسويه قبل ما يموت
اشياا وايد مثل هاي..ما نقدر نتحكم فيها
نقدر نختار مثلا تخصصنا فالجامعه..نوع الاكل اللي بناكله..المكان اللي بنسكن فيه
وطبعا حتى هالخيارات مش متوافره لكل الناس
تعالوا خلنا كل واحد فينا يسال نفسه
هو شو اختار فحياته..وشو الشي اللي انفرض عليه
انا عن نفسي ..اول شي ما اخترته فحياتي..اني انولد بين ام واب منفصلين
كنت دوم اتخيل اني ارجع من المدرسه القى امي وابوي فبيت واحد
واتخيل يا ترى شو ممكن يكون احساسي ساعتها؟
اعرف ان ها شي عادي وايد بالنسبالكم لانكم متعودين عليه
بس بالنسبه لانسانه ما عاشت بجو اسره..بالنسبالي ها شي ما حسيت فيه
واتخيل لو صار شو ممكن يكون شعوري..ولاي مدى اصلا ممكن يصير؟
الحين طبعا كبرت وتجاوزت خيالات الطفوله..
بس رغم هالشي احط موضوع انفصال عائلتي على بداية قائمة الامور اللي ما اخترتها
وهو ابرز الامور اللي اعتبرها فرضت علي!!
يمكن لان هالموضوع ترتبت عليه نتايج ثانيه وايد بحياتي
الحين ارد بذكرياتي لورى..ما كان في شي مهم ما اخترته تقريبا
بيني وبينكم خياراتي ما كانت متعدده..فشيئ طبيعي اني مع ندرة الخيارات وقلتها
اختار افضل الموجود..هذا طبعا ان توافر:)
غالبا كنت اتخيل اني يوم بكمل ال18 سنه بستقل بسكن بروحي
كنت متاثره وايد بموضوع الاستقلال
كنت ابا اعتمد على نفسي بكل شي
يمكن لان جو البيت كان مشحون وايد
عشان جيه كان دوم هدفي الوحده والاستقلال
كنت ابا اشتغل واسكن بشقه بروحي واقطع صلتي بكل افراد عائلتي
طبعا هالكلام لين وصلت ال16 او 17 سنه
كان بالنسبالي هالكلام قرار محسوم ومفروغ منه
بس بعدين كبرت وتغيرت حياتي شوي..وكبر عقلي مثل ما يقولون:)
المهم احس اني اليوم تكلمت وايد واحس اني سويت موضوع تعبير
يكفي اليوم..وبكمل مره ثانيه ان شالله

هناك تعليقان (2):

محمد الكمالي يقول...

لعل الكثير من الأشياء تغيير من حياتنا
مثلاً السن فكلما كبر الإنسان تغيرت نظرته للحياة.
كثرة القراءة : فبواسطتها تتفتح أمامنا آفاق كانت مغلقة وطرق كنا نجهلها .
ولقد نسيت الأسرة المحضن الرئيسي الأول فالأسرة إذا كانت واعية وذو ثقافة وأخلاق تنتقل هذه الخبرات إلى الجيل الذي يليهم .
لعل الذي ذكرتيه يشترك فيه الكثير ولكن يختلفون في كيفية التصرف

اقصوصه يقول...

مبارك عليك الشهر

فعلا الحياه تعلمنا..والسنين تجارب

وشخصية الانسان تطور مع الوقت

ويكون عنده قدره اكبر على التعامل مع مشاكله وبيئته وحياته بشكل عام

سعيده بزيارتك لمدونتي